Ishki ister ministri Erlan Turǵymbaev Sátbaevtaǵy bes jasar qyz balanyń joǵalýyna qatysty oqiǵanyń mán-jaiyn aityp berdi, dep habarlaidy "Ult aqparat".
«23 shilde kúni keshki saǵat 9-da Sátbaev qalasynyń Ishki ister basqarmasyna 5 jasar qyzdyń joǵalǵany týraly aryz tústi. Dereý izdestirý nátijesinde búldirshin qaladaǵy bir úiden tabyldy. «Jas qyzdy» zorlady degen kúdikpen bir azamat qamaýǵa alyndy. Biraq birneshe adam kúdiktini óz qolyna berýdi talap etti, janjal shyǵardy», - dedi Erlan Turǵymbaev OKQ-da ótken baspasóz máslihatynda.
Ministrdiń aitýynsha olar buzaqylyq jasap, politseilerge qarsylyq tanytqan.
«Tártipsizdikke jol bermeý úshin qosymsha politsiia kúshteri tartylyp, jaǵdai baqylaýǵa alyndy. Bul oqiǵa boiynsha birneshe bappen qylmystyq is tirkeldi. Tergeý amaldary jalǵasýda. Eldegi qoǵamdyq tártip pen azamattardyń qaýipsizdigin qamtamasyz etý úshin politseiler bar kúshin jumsaidy», - dedi ol.
Sonymen birge Erlan Turǵymbaev halyqqa úndeý joldady.
«Áleýmettik jeli arqyly tarap jatqan, jalǵan aqparattarǵa senbeńizder! Jáne ony taratpańyzdar! Tek resmi aqparatqa senińizder! Ishki ister ministrligi únemi monitoring júrgizip, jaǵdaidy baqylap otyr. Jalǵan, negizsiz aqparat taratýǵa qatysty zańǵa sáikes qylmystyq jaýapkershilik qarastyrylǵan», - dedi ol.
Eske sala keteiik, jumaǵa qaraǵan túni Sátpaev qalasynda tártipsizdikter bastaldy. Oǵan joǵalǵan 5 jasar qyzdyń belgisiz er adamnyń páterinen tabylýy sebep bolǵan.
Búldirshindi búkil qaladan izdedi. Bala tabylǵannan keiin kúdikti turatyn úidiń mańyna bir top adam jinaldy. Olar kúdiktini ózderi jazalamaq bolǵan.
Ashýly top barlyq páterdiń esigin qaǵyp, turǵyndardyń záresin ushyrǵan.
Halyq tolqýyn basý úshin qalaǵa Ulttyq ulan kúshteri tartyldy.
Sodan keiin jinalǵandar kúdiktini berýdi talap etip, qalalyq ákimdikke qarai bet aldy.
Qala biligi bala anasynyń qasynda ekenin málimdedi jáne turǵyndardy arandatýshylyqqa ermeýge shaqyrdy.
Tańǵa qarai qalada jaǵdai turaqtaldy.
