Sátbaev qalasynda gastrolde júrgen «Shapito» tsirkiniń 18 jastaǵy ártisiniń denesi tabyldy, dep habarlaidy QazAqparat.
Politsiia Mariia Kattsýn óz-ózine qol jumsady dep boljam jasady. Alaida boijetkenniń jaqyndary bul nusqaǵa senbeitinderin aityp otyr. Bul týraly olar jelide jazba jariialady.
Qyz balanyń dostary Mariia árqashan salaýatty ómir saltyn ustanǵanyn, sportpen ainalysqanyn jáne árdaiym tsirkte óner kórsetýdi armandaǵanyn aitady.
Mariia estradalyq tsirk ýchilishesinde oqyp, jazda Almaty qalasynyń «Shapito» tsirkimen óndiristik tájiribeden ótý týraly kelisimshartqa qol qoiǵan. Qaiǵyly oqiǵa kezinde tsirk Sátbaev qalasynda gastrolde bolǵan.
«Atalmysh fakt boiynsha Sátbaev politsiia bólimi QR QK-niń 105-baby «Ózin-ózi óltirýge deiin jetkizý» boiynsha sotqa deiingi tergeýdi bastady. Tiisti saraptamalar taǵaiyndaldy, olardyń nátijeleri boiynsha protsessýaldy sheshim qabyldanatyn bolady», - dep habarlady Ulytaý aýdany PD baspasóz qyzmeti.
