Olimpiada oiyndaryn tamashalaýdan qur qalǵan biz birde ana jelige, birde myna jelige kirip, nátijelerin kórip otyramyz áiteýir. Qazaqstan ulttyq quramasy ázirge durystap bir silkine almaýda. Dál osy mezette Nur-Sultanda sporttyń kóptegen túrinen bolashaq olimpiadashylardy daiarlaýmen ainalysatyn «Saryarqa» velotregi tóńireginde tótennen kelgen daý órship tur. Olimpiada chempiony, qazirgi sheneýnik, sport jáne dene shynyqtyrý komitetiniń tóraǵasy Serik Sapiev atalǵan keshendi jekemenshikke ótkizý týraly tiisti qujatqa qol qoiǵan desedi.
Al, bul máseleniń týyndaǵanyna kóp bola qoiǵan joq. Alaida elimizdiń mádeniet jáne sport ministrliginiń osyǵan bailanysty túsinik beretin túri joq.
Esterińizge sala ketsek, bul keshenniń qurylysyna memleket tarapynan 124 million AQSh dollary jumsalǵan bolatyn. Qazirgi baǵammen eseptegende, bul degenińiz 53 milliard teńge eken. Qazirgi tańda sportshylar osy keshende sporttyń 18 túrimen shuǵyldanady.
Jekeniń qolyna ótken jaǵdaida, ol jerde tek velotrek qana qalyp, jyl saiyn 2 milliard teńge ǵana sýbsidiia tólenedi dep kútilýde.
Sporttyń qalǵan 17 túriniń taǵdyry ázirge beimálim qalyp otyr. Sol siiaqty osy mańyzdy obektiniń kimniń qolyna ótetini de jumbaq kúiinde.
Astanamyzdyń sol jaǵalaýynda ornalasqan «Saryarqanyń» jalpy aýmaǵy 50 000 sharshy metrdi quraidy. Velotrek pen muz aidynyn qamtityn bul keshende olimpiada sportshylary daiarlyqtan ótedi, sonymen qatar turmysy tómen otbasylar men múgedekter úshin de jeńildikter qarastyrylǵan edi.
Keshenniń eń mańyzdy artyqshylyǵy mynada. Ondaǵy arenany kez-kelgen sátte boks, dziýdo, gimnastika, basketbol, voleibol jarystaryn ótkizýge, sondai-aq kontserttik baǵdarlamalar uiymdastyrýǵa yńǵailastyrýǵa bolady.
Sonymen, Astananyń sol jaǵalaýynda jasalyp jatqan bylyqtar bir-birimen battasyp jatyr.
Sportqa esh qatysy joq kompozitor-ministr Japoniiaǵa at terletip baryp, olimpiadany japadan jalǵyz tamashalap máz, al ulttyq arnalardan jankúier bolýdy qansha armandaǵan biz sekildi qarapaiym jurt joǵary bilikte otyrǵan sheneýnikterdiń bul áreketin túsinbei dal bolýda. Basqa basqa sport jáne dene shynyqtyrý komitetiniń tóraǵasy Serik Sapiev muny túsinýi tiis emes pe! Ne teledidarda joq, tek áleýmettik jelilerden ǵana oqimyz da qoiamyz. Biz qai ǵasyrda ómir súrip otyrmyz?
Al chempiondar ligasy degende, barlyq transliatsiiaǵa qyrýar qarjy bólinedi. Aý, Olimpiada oiyndarynda elimizdiń namysyn jyrtýǵa barǵan jerlesterimizge kók jáshikke telmirip, qoldaý kórsete almasaq, eldigimiz qaida?
Endi mine sol soraqylyqtyń sońyn ala Nur-Sultannyń qaq tórindegi «Saryarqa» da qoldy bolyp ketpek pe! Al, Mádeniet (ókinishke qarai sport emes) ministrliginiń jaǵasy jailaýda.
Sóitip, kimniń qolyna, kimge ótpek? Bizdiń salyq tólemderimizdiń esebinen salynǵan osyndai OBEKTILER bizdiń pikirimizdi pysqyrmai, jeke menshikke óte berýi tiis pe?
Memlekettik jeke kásipkerlik mekemesi múmkindiginshe qoldan kelgenniń bárin jasap jatyr. Bir jaǵynan olardy túsinýge de bolady. Degenmen olardyń da jumysyn miz baqpas sheneýnikter ábden sergeldeńge salǵanǵa uqsaidy.
Shyntýaityna kelgende, Mádeniet ministrligi memleketimizge degen senimdi tam-tumdap joǵalta bastady!
Turmysy tómen otbasylar men múgedekter tirnektep jiǵan-tergenderin sportpen shuǵyldanýǵa, salaýatty ómir saltyn qalyptastyrýǵa jumsap, keibir ata-analar ózderiniń qoldary timese de, baldaryn sport úiirmelerine berdim dep máz bop júrgende, kenetten osyndai problemalarǵa uryna bastady. Jer astynan jik shyqty, eki qulaǵy tik shyqty! Sonda sporttyń qalǵan 17 túrin shendi-shekpendiler doibynyń tastary sekildi taqtadan shertip-shertip dalaǵa laqtyryp tastai bergeni me?
Eń soraqysy sol, jekeniń qolyna ótip ketken jaǵdaidyń ózinde jeke menshik iesine memlekettik biýdjetten jyl saiyn 2 milliard teńge bólinip otyrady eken! Al bul aqsha tek velosportshylar úshin ǵana!
Endi myna faktige nazar aýdaryp kórińizshi. Olimpiada sportshylaryn daiarlaityn ortalyqtyń eki kesheni bar. Sporttyń ondaǵan túrlerine ol jerde jylyna shamamen 2,8 milliard teńge bólinedi. Sonda velosport bizdiń ulttyq oiyn túri me?
Egemendiktiń alǵashqy jyldary eriksiz esimizge túsedi. Memlekettik obektiler, balabaqsha, basqa da mádeni oshaqtar bolmashy baqyrǵa satylyp, sheneýnikterdiń shekpenin jamylǵandar oilaryna kelgenin jasai bastady.
Túk ózgermeppiz! Baiaǵy jartas - sol jartas!
A. Arman
