QR Energetika ministri Bolat Aqsholaqov BAQ ókilderine eldiń soltústigi men shyǵysyndaǵy óńirlerdi gazdandyrý múmkindikteri týraly málimet berdi, dep habarlaidy QazAqparat.
«Soltústik jáne shyǵys óńirlerge gaz tartý máselesi boiynsha mamyr aiynyń aiaǵynda, kelesi aptada issaparǵa ushamyn. Sol jaqta Resei Federatsiiasynan gaz tasymaldaýdyń tehnikalyq, ekonomikalyq máseleleri, baǵasy boiynsha áńgime júrgizemin. Bul – óte keshendi másele. Osymen qatar, óz ishimizdegi gaz qubyrlaryn soltústik jáne shyǵys baǵyttarda damytý kerek. Biraq, qazirgi «Saryarqa» gaz qubyry Qaraǵandy jáne qaitadan qurylyp jatqan Ulytaý oblystary arqyly Nur-Sultanǵa jetedi. Odan ári kelesi kezeńde Aqmola oblysy – Kókshetaý qalasy men Petropavlǵa deiin tartylady. Osyndai jeli bar», - dedi vedomstvo basshysy.
Onyń aitýynsha, bul qubyrdan shyǵys baǵytqa Pavlodar arqyly tarmaq shyǵarýǵa bolady.
«Pavlodardan ári qarai Semei dep kete beredi. Alaida, bul – joba ǵana. Ózimizdi tabiǵi gazdyń kózderinen qamtamasyz etý úshin Batys óńirlerden qosymsha ári turaqty gaz qoryn tabýymyz kerek. Mundai gaz qory tabylǵan kúnniń ózinde jańa qubyr tartý qajet. Óitkeni, qazir qoldanyp otyrǵan «Saryarqa» gaz qubyry onyń bárin kótere almaidy. Qaraǵandy oblysy men Nur-Sultan qalasynyń qajettiligin ǵana jabýǵa qaýqarly. Sonda báribir jańa qubyr salý kerek bolady. Bárinen de Reseiden gaz ala turyp, óz ishimizdegi qubyrlardy qatar damytý jeńil bolatyn shyǵar. Onyń ózinde, ózimizdiń gaz Reseidikinen arzan bolady degen naqty derek joq. Óitkeni, Batys Qazaqstannan Petropavlǵa deiingi aralyq 2000 shaqyrymnan asady. Al, Reseiden beri tartsaq, 500-600 shaqyrym. Qashyqtyń aiyrmashylyǵy orasan. Al, gaz qubyrynyń shyǵyny tikelei soǵan bailanysty», - dedi Bolat Aqsholaqov.
