Búgin Ońtústik Qazaqstan oblysynyń ákimi Janseiit Túimebaev arnaiy jumys saparymen Saryaǵash aýdanyna bardy. Óńir basshysy aldymen Jemisti aýyldyq okrýgindegi «Yntymaq Bes-Arys» JShS-de bolyp, sharýashylyqtyń qarqyndy baýyn aralap kórdi, dep habarlaidy ákimniń baspasóz qyzmeti.
2009 jyly qurylǵan seriktestik 2015 jyldan bastap qarqyndy baý egýmen ainalysyp keledi. Búginde qojalyq ieligindegi 36 gektar jerge tamshylatyp sýarý ádisimen almai baý egilgen. Munda almanyń Jersi Mak, Janjir Gold, Viliams Praid, Gala, Golden Delishes, Red Delishes, Skarlet Spýr, Jeromin Grenni Smit, Fýndji, Pank Ledi Saltanat túrleri jaiqalyp ósip tur. Jylyna 80 mln teńgeniń ónimin óndiretin seriktestikte 30 adam turaqty jumyspen qamtylǵan.
Oblys ákimi aýdan basshysy men qojalyq tóraǵasyna memleket tarapynan kórsetilip jatqan barlyq jeńildikterdi tiimdi paidalanýdy tapsyrdy.
«Saryaǵash aýdanynyń tabiǵi-klimattyq jaǵdaiy jemister men kókónis kóshetterin ósirýge óte qolaily. Sondyqtan atalǵan seriktestik basshylyǵyna memleket tarapynan beriletin sýbsidiia men túrli nesielik jeńildikterdi tiimdi paidalaný qajet. Ol úshin tiisti qujattardy rettep, der kezinde áreket etken jón. Aldaǵy jyldary klimaty men topyraǵy sáikes keletin ózge aýdandarǵa osy tálimbaqta ósirilgen kóshetterdi jersindirý isin jandandyrýdy tapsyramyn»,- dedi Janseiit Qanseituly.
Munan soń óńir basshysy Saryaǵash qalasyndaǵy aýdandyq biýdjet esebinen 35 mln teńgege salynǵan «Ana men bala» alleiasyn aralap kórdi. Alleianyń negizgi maqsaty - otbasy qundylyqtaryn dáriptep, anaǵa degen qurmetti nasihattaý, ulttyq salt-dástúrlerimizdi damytý bolyp tabylady. Alleianyń qurylysyn «Saryaǵash-Tazalyq» memlekettik kommýnaldyq kásiporyny júrgizipti. Jańa nysanda oblys ákimi saryaǵashtyq turǵyndarmen kezdesip, ózara pikir almasty. Jergilikti azamattar aýdandat atqarylyp jatqan jumystar týraly áńgimelep, oilaryn ortaǵa saldy.
