Rejisser Ádilhan Erjanovtyń «Sary mysyq» filmi Qazaqstan atynan «Oskar» júldesiniń «Sheteldiń úzdik film» nominatsiiasyna usynyldy. Kinotýyndyny Short Brothers (Qazaqstan), Sh.Aimanov atyndaǵy «Qazaqfilm» kinostýdiiasy jáne Arizona Productions (Frantsiia) qompaniialarynyń qatysýymen Zerde Films (Qazaqstan) kompaniiasy túsirdi.
Film qazaqstandyq «Bonni men Klaidtyń» oqiǵasyn baiandaidy. Kermek esimdi jas jigit túrmede jazasyn ótep, qylmystyq top iemdenip, óziniń qatal zańdaryn ornatqan týǵan qalasyna oralady. Jigittiń ǵashyǵy Eva qylmyskerlerdiń yqpalynan teris jolǵa túsken. Kermek ózi de qylmysqa belshesinen batady. Biraq ol súigen qyzymen birge erkindikke qol jetkizip, kinoteatr salý týraly armanyn tastamaidy. Ol qalai da armanyna qol jetkizýge bel bailaidy...
«Sary mysyq» – rejisser Ádilhan Erjanovtyń toǵyzynshy tolyqmetrajdy kórkem filmi. Túsirilim jumystary byltyr Almaty oblysynda ótti. Filmniń Bas prodiýserleri: Ásel Sádýaqasova, Qanat Bitemirov jáne Erbol Toibaev.
Filmniń álemdik túsaýkeseri 77-shi Halyqaralyq Venetsiia kinofestivali sheńberinde ótti. Sondai-aq kinotýyndy Reseidiń «Nika» nominatsiiasyna jáne Asian Film Awards júldesiniń «Úzdik rejisser», «Úzdik operator» jáne «Úzdik sýretshi» úsh birdei nominatsiiasyna usynylǵan bolatyn.
Osy ýaqyt aralyǵynda atalǵan film Qytaida ótken «Jibek joly» halyqaralyq kinofestivalinde «Erekshe stsenarii» júldesimen, Batýmide jáne Stokgolmde ótken Hope International Film Festival festivalinde «Úzdik rejisser» júldesimen, «Máskeýlik tusaýkeser» kinofestivalinde kinosynshylardyń júldesimen, Verona International Film Festival jáne Brugge International Film Festival kinofestivalderinde «Úzdik kórkem film» júldesimen marapattalǵan bolatyn.
Filmniń stsenarii avtorlary Ádilhan Erjanov pen Inna Smailova. Prodiýserlik mindetti rejisserdiń turaqty áriptesteri Serik Ábishev pen Olga Hlasheva atqardy. Kartinanyń ko-prodiýseri frantsýz mamany Giiom de Siel. Filmniń operatory osyǵan deiin Ádilhan Erjanovtyń «Úkili kámshat» jáne «Atbaidyń shaiqasy» filmderin taspalaǵan – Erkinbek Pitiráliev. Qoiýshy sýretshi – Ermek Ótegenov, mýzykasyn Alim Zairov jáne Ivan Sintsov jazdy. Filmge Azamat Nyǵmanov, Kamilla Nuǵymanov, Sanjar Madi jáne basqalary tústi.
«Oskar» júldesiniń saltanatty marapattaý rásimi Los-Andjeleste 2022 jyly 27 naýryzda ótedi.
