Almaty oblysynda jas sarbazdy granata jarylysynan qutqaryp qalǵan QR Ulttyq qaýipsizdik komitetiniń polkovnigi ordenmen marapattalady. Bul týraly Prezident Qasym-Jomart Toqaev Twitter-de jazdy, dep habarlaidy "Ult aqparat".
«UQK Shekara qyzmetiniń polkovnigi S.Smitskih erlik jasady. Ol Almatydaǵy oqý-jattyǵý kezinde jas jaýyngerdi granata jarylysynan qutqaryp, ózi jaraqat alyp qaldy. Ordenmen marapattalatyn bolady», - dedi Memleket basshysy.
Buǵan deiin habarlaǵanymyzdai, tótenshe oqiǵa, keshe 19 maýsym kúni Almaty oblysynda ornalasqan 2027 áskeri bóliminde boldy.
Sarbazdar «Urystyq qol granatasyn okoptan, bir orynnan laqtyrý» taqyryby boiynsha oqý-jattyǵý ótkizip jatqan. Jas jaýyngerlerdiń biri sasqalaqtap, shyǵyrshyǵyn sýyryp qoiǵan qolyndaǵy granatasyn aiaǵynyń astyna túsirip alǵan. Osyny baiqap úlgergen sabaq jetekshisi, 2027 áskeri bólimi komandiriniń tárbie jónindegi orynbasary, polkovnik Sergei Smitskih kóz ilespes jyldamdyqpen okop túbindegi granatany ilip alyp, qaýipsiz jerge laqtyryp jibergen. Al ózi sarbazdy jerge qulatyp, búkil denesimen ony jaba, ústine qulaǵan.
Jarylǵan granatanyń jaryqshaqtary okopqa deiin jetip, polkovniktiń eki aiaǵy men eki qoly, sarbazdyń qos aiaǵy men sol jaq jaýyryny jaraqattandy.
Áskeri dáriger alǵashqy kómek kórsetkennen keiin, jaralanǵan polkovnik pen sarbaz Ile aýdany Ótegen Batyr kentiniń ortalyq aýdandyq aýrýhanasyna jetkizildi. Olar odan ári qarai Almaty qalasyndaǵy UQK ortalyq áskeri gospitaline jóneltildi. Qazirgi ýaqytta ekeýiniń de jaǵdaiy birqalypty.
