Shymkentte ulttyq ulan sarbazdary júkti áieldiń ómirin qutqaryp qaldy, dep habarlaidy QazAqparat.
Aiaq astynan esinen tanyp qalǵan júkti áielge 6506 áskeri bóliminiń serjanty Kenjetai Otarbai men qatardaǵy jaýynger Turar Ýahit der kezinde kómek kórsetti.
QR Ulttyq ulany baspasóz qyzmetiniń málimetine qaraǵanda, áskeri qyzmetshiler sol kúni ádettegidei patrýldik-kezekshilik mindetin atqaryp júrgen. Olar kestege sáikes Mádeli qoja kóshesimen kele jatyp, jol jieginde esinen tanyp jatqan áieldi baiqap qalady. Serjant Kenjetai Otarbai dereý ekiqabat áieldiń júrek tusyn ýqalap, jasandy tynys alýyna kómektesken. Osy kezde janyndaǵy sarbaz jedel járdem qyzmetin shaqyrtqan.
Der kezinde alǵashqy meditsinalyq kómek kórsetýdiń arqasynda kelinshek esin jiyp, oblystyq aýrýhanaǵa jetkizildi. Dárigerlerdiń aitýynsha, júkti áiel tiisti emderin qabyldaýda. Onyń densaýlyǵy men ishindegi sharanasyna eshbir qaýip joq.
