Saraishyqta jumys istep, zertteitin arheolog, shyǵystanýshy, qoljazba tanýshy mamandar daiyndaý kerek. Bul týraly elordada ótken «Saraishyq - Uly dala muraǵaty: memlekettik jáne tarihi sabaqtastyq» atty dóńgelek ústelde aityldy, dep habarlaidy QazAqparat tilshisi.
«Saraishyq - bizdiń babalarymyz imperiia biigine kóterilgen dáýirde dúniege kelgen. Arǵy babalarymyz baiyrǵy túrkiler imperiiasynyń, Saraishyq, Altyn Orda dáýirindegi imperiia quramynda ómir súre júrip, keremet biregeilikke, rýhaniiatqa ie boldy», - deidi Ulttyq ǵylym akademiiasynyń akademigi, tarih ǵylymdarynyń doktory, professor Hangeldi Ábjanov.
Onyń aitýynsha, Saraishyqty sol imperiialyq kezeńniń tamasha kórinisi retinde ulyqtaýymyz kerek.
«Qazaqstannyń bir qiyrynda jatqan qazynany zertteý úshin bizge mamandar kerek. Saraishyqta jumys istep, zertteitin arheolog, shyǵystanýshy, qoljazba tanýshy mamandar daiyndaý qajet. Jastardy iriktep, magistratýrada, phd doktorantýrada oqytý kerek. Olar bes jyldan keiin qazir bastaǵan isti jalǵastyryp ketedi», - deidi ol.
