Joǵary oqý oryndarynda arheologiialyq mamandyqty kúsheitý kerek. Myqty arheolog maman daiyndaý úshin qysqa merzimdi arheologiialyq praktika tym az. Bul týraly elordada ótken «Saraishyq - Uly dala muraǵaty: memlekettik jáne tarihi sabaqtastyq» atty dóńgelek ústelde aityldy, dep habarlaidy QazAqparat tilshisi.
«Búgin mádeni muramyzdy saqtaý jáne nasihattaý máselesi kóterilip otyr. Osy sharada aitylatyn usynystardy júielep, naqty jumys isteýge daiynbyz. Osy oraida «Altyn Orda ǵasyryna arnaiy memlekettik ǵylymi-zertteý konkýrstaryn jariialaý kerek« degen usynys aitylyp otyr. Sońǵy eki jyl boiy jyldyq biýdjetten jas ǵalymdardyń ǵylymi-zertteý jumystaryna 3 mlrd teńge qarjy bólinip otyr. Atalǵan jobany júzege asyrý úshin qarajat bar dep oilańyzdar», - dedi óz sózinde QR Parlamenti Májilisiniń depýtaty Beibit Baimaǵambetuly.
Ol byltyr jyl sońynda tarihi-mádeni murany saqtaý týraly zań qabyldanǵanyn atap ótti.
«Ol zańmen bárińiz tanystyńyzdar dep oilaimyn. Endi normativtik-quqyqtyq qujattar daiyndaý, zańdy júzege asyrý jumystary QR Mádeniet jáne sport ministrliginiń qolynda. Tarihi, mádeni muramyzdy saqtaý úshin elimizde ekspeditsiia ótkizgen durys. Kóne joldar, jaiylymdar, jailaý, qystaýlar turǵan jerlerde tarihymyz bar», - deidi ol.
Sondai-aq, depýtat týrizmdi damytý baǵytynda on aimaqqa basymdyq berilgenin, onyń ishinde Saraishyq joq ekenin aitty.
«Negizinde Saraishyq týristik nysandar qataryna kirýi kerek edi. Eń aldymen joǵary oqý oryndarynda arheologiialyq mamandyqty kúsheitý kerek. Myqty arheolog maman daiyndaý úshin qysqa merzimdi arheologiialyq praktika tym az», - deidi Beibit Baimaǵambetuly.
Shara Altyn Ordanyń 750 jyldyǵy, Qasym hannyń týǵanyna 575 jyl, Qazaq handyǵynyń 555 jyldyǵyna orai ótti.
