Memleket basshysy Qasym-Jomart Toqaevtyń Qazaqstan halqyna Joldaýy qarsańynda Qazaqstan Respýblikasy Zańnama jáne quqyqtyq aqparat institýtynyń jetekshi ǵylymi qyzmetkeri Darhan Shúkirbaiuly Tókeev konstitýtsiialyq reformanyń eldiń saiasi jańǵyrýy men memlekettik basqarý júiesin jetildirýdegi mańyzyna toqtaldy. Onyń aitýynsha, negizgi zańǵa engizilgen ózgerister azamattardyń quqyqtary men múmkindikterin keńeitip, memleket pen qoǵam arasyndaǵy ózara bailanysty kúsheitýge baǵyttalǵan.
"Qazaqstan Respýblikasyndaǵy konstitýtsiialyq reforma elimizdiń saiasi jańǵyrýy men memlekettik basqarý júiesin jetildirý jolyndaǵy mańyzdy qadamdardyń biri boldy. Negizgi zańǵa engizilgen ózgerister ádilettilik qaǵidattaryn nyǵaitýǵa, memlekettik institýttardyń jaýapkershiligin arttyrýǵa jáne azamattardyń qoǵamdyq-saiasi úderisterge qatysý múmkindikterin keńeitýge baǵyttalǵan", - deidi ol.
Darhan Shúkirbaiulynyń aitýynsha, Reformanyń mańyzdy baǵyttarynyń biri — qoǵam men memleket arasyndaǵy ózara bailanysty nyǵaitý. Osy turǵyda Quryltai, Halyq keńesi, Vitse-Prezident institýty jáne basqa da qoǵamdyq-saiasi tetikterdiń mańyzy arta túsedi.
"Bul institýttar azamattardyń pikirin eskerýge, ashyq dialog ornatýǵa jáne biliktiń halyq aldyndaǵy jaýapkershiligin kúsheitýge múmkindik beredi.
Konstitýtsiialyq ózgerister azamattardyń quqyqtary men bostandyqtaryn qorǵaýdy jetildirýge, memlekettik basqarýdyń tiimdiligin arttyrýǵa jáne azamattyq qoǵam institýttaryn damytýǵa negiz qalyptastyrady. Sonymen qatar bul ózgerister eldiń saiasi júiesin zaman talabyna sai jańǵyrtyp, qoǵamnyń turaqty damýyna jaǵdai jasaýǵa baǵyttalǵan", - dep esepteidi ol.
Sarapshy qorytyndylai kele, konstitýtsiialyq reforma — tek zańnamalyq ózgerister jiyntyǵy emes, memlekettiń bolashaq damý baǵytyn aiqyndaityn mańyzdy qadam ekenin atap ótti.
"Onyń túpki maqsaty — halyqtyń múddesin qorǵaý, azamattardyń quqyqtary men múmkindikterin keńeitý jáne memleket pen qoǵam arasyndaǵy ózara senimdi nyǵaitý. Konstitýtsiia el damýynyń berik negizi retinde ýaqyt talabyna jaýap berip, ádiletti ári zamanaýi Qazaqstandy qalyptastyrýǵa qyzmet etýi tiis. Sondyqtan konstitýtsiialyq reformanyń tabysty júzege asýy ár azamattyń belsendiligine, jaýapkershiligine jáne el bolashaǵyna degen ortaq ustanymyna tikelei bailanysty", - dedi zańger.
