Prezidenttiń kómekshisi - Qaýipsizdik Keńesiniń hatshysy Qalmuhanbet Qasymovtyń tóraǵalyǵymen Qazaqstan Respýblikasy Qaýipsizdik Keńesiniń janyndaǵy Sarapshylyq keńesiniń otyrysy ótti, dep habarlaidy Aqordanyń resmi saity.
Atalǵan sharaǵa salalyq ulttyq ǵylymi-zertteý institýttardyń basshylary, úkimettik emes uiymdardyń sarapshylary, sondai-aq quzyretti memlekettik organdardyń ókilderi qatysty.
Q.Qasymov ulttyq qaýipsizdikti qamtamasyz etý isin aqparattyq-taldaý jáne ǵylymi-ádistemelik turǵydan súiemeldeýdiń, qaýipti qaterler men syn-tegeýrinderdi tereń saraptaýdyń mańyzdylyǵyn aitty.
Jiyn barysynda sý sharýashylyǵy qaýipsizdigin qamtamasyz etý máseleleri keńinen talqylandy. Qaýipsizdik Keńesiniń hatshysy sý resýrstarynyń azaiýy jáne onyń sapasynyń nasharlaýy halyqtyń turmysyna jáne ekonomikanyń turaqty damýyna keri áser etedi.
Sarapshylar asa qaýipti qaterlerdi, sonyń ishinde sýdyń tiimsiz paidalanylýyn, jekelegen gidrotehnikalyq qurylystardyń apattyq jaǵdailaryn, sý qoimalardyń lastanýyn egjei-tegjeili talqylady.
Otyrysqa qatysýshylar sý resýrstaryn baqylaityn memlekettik basqarý júiesin jáne monitoringti, sý salasyn ǵylymi jáne kadrlyq turǵydan qamtamasyz etý isin jetildirý jóninde pikir almasyp, usynystaryn ortaǵa saldy.
Qazaqstannyń sý resýrstary negizinen transshekaralyq ózenderdiń esebinen jinalatynyn eskerip, transshekaralyq sýlardy paidalaný máselelerine erekshe nazar aýdaryldy.
Jiynda sý qaýipsizdiginiń qaýpin azaitýǵa baǵyttalǵan keshendi tásilder qajettigi atap ótildi.
Sarapshylyq keńes jumysynyń qorytyndysy boiynsha Qaýipsizdik Keńesi men memlekettik organdardyń jumysynda paidalanylatyn naqty usynystar pysyqtaldy.
