Búgin, 3 qarashada Almatyda Ulttyq qoǵamdyq senim keńesiniń (budan ári – UQSK, Ulttyq keńes) aiasynda sarapshylar Qazaqstan óńirlerinde aýyl ákimderiniń tikelei sailaýyn ótkizý barysyn talqylady, dep habarlaidy QazAqparat.
Is-sharaǵa UQSK músheleri, belgili qazaqstandyq saiasattanýshylar men áleýmettanýshylar qatysty. Basqosýdy QR Prezidentiniń kómekshisi, Ulttyq keńes hatshysy Erlan Karin ashty.
Aýyl ákimderiniń tikelei sailaýyn ótkizý týraly bastama alǵash ret Prezident Q.K. Toqaevtyń 2020 jylǵy Qazaqstan halqyna Joldaýynda kóterilgen bolatyn. Bul bastamany iske asyrý maqsatynda 2021 jylǵy mamyrda 2 tiisti zań qabyldanǵan edi. Atap aitqanda, «Qazaqstan Respýblikasyndaǵy sailaý týraly» QR Konstitýtsiialyq zańyna ózgerister men tolyqtyrýlar engizý týraly» QR Konstitýtsiialyq zańy jáne «Qazaqstan Respýblikasynyń keibir zańnamalyq aktilerine sailaý máseleleri boiynsha ózgerister men tolyqtyrýlar engizý týraly» QR zańy.
Osy oraida Prezidenttiń kómekshisi Erlan Karin «qazirgi tańda 811 aýyldyq okrýgte ákimderdiń tikelei sailaýy ótkizilgendigin, bul sailaý sailaýshylar arasynda, sonymen birge sailaý naýqanynda asa belsendilik tanytqan saiasi partiialar arasynda da aitarlyqtai joǵary qyzyǵýshylyq týdyrǵanyn atap ótti. Nátijesinde sailanǵan ákimderdiń 86% saiasi partiialardan usynylǵan úmitkerler qurady. 14% – ózin-ózi usynǵan úmitkerler. Sonymen qatar, sailanǵan ákimderdiń jartysy (51%) sailaýǵa deiin bul qyzmetterdi atqarmaǵan jańa adamdar.
Talqylaý barysynda «Strategiia» áleýmettik-saiasi zertteýler ortalyǵy» qoǵamdyq qorynyń jetekshisi Gúlmira Ileýova Roza Liýksembýrg qory úshin daiyndalǵan «Jergilikti sailaýda tikelei daýys berýdiń táýekelderi men múmkindikteri» zertteýiniń nátijelerimen tanystyrdy. Zertteýde aýyldyq jerlerdegi ekonomikalyq jaǵdai, jergilikti qaýymdastyqtyń erekshelikteri, aýyl turǵyndarynyń saiasi reformalarǵa qyzyǵýshylyǵy jáne olardyń elektoraldyq minez-qulqy kórsetilgen.
Sondai-aq, UQSK jáne Prezidenttik jastar kadrlyq rezerviniń birlesken zertteý tobynyń jetekshisi Aleksandr Danilov 4 oblystyń (Pavlodar, Qostanai, Túrkistan jáne Shyǵys Qazaqstan) aýyl ákimderiniń sailaýy ótken aýyldyq okrýgterine barý negizinde daiyndalǵan taldamalyq baiandamany usyndy. Ol óz sózinde aýyldyq okrýg ákimin tikelei sailaýyna bailanysty aýyl turǵyndarynyń jalpy pikiri jaqsy ekenine nazar aýdardy.
Aita ketken jón, budan buryn Mańǵystaý, Soltústik Qazaqstan jáne Qaraǵandy oblystarynda UQSK músheleriniń kóshpeli otyrystary aiasynda aýyl ákimderiniń tikelei sailaýyna daiyndyq barysy men aýyldardy damytý máseleleri talqylanǵan bolatyn.
Talqylaý qorytyndysy boiynsha mamandar aýyl ákimderin tikelei sailaý tetigin jetildirý boiynsha birqatar usynystar berdi.
Ulttyq qoǵamdyq senim keńesiniń aldaǵy altynshy otyrysynda da aýyl ákimderi sailaýynyń jalpylama qorytyndylary shyǵarylady.
