Almatyda «AMANAT» partiiasynyń jańa Saiasi tuǵyrnamasy jobasynyń saraptamalyq talqylaýy ótti. Kezdesýge partiia Hatshysy Dáýlet Káribek, Májilistegi «AMANAT» fraktsiiasynyń múshesi, tuǵyrnamany ázirleý jónindegi jumys tobynyń jetekshisi Aidos Sarym, táýelsiz sarapshylar, saiasattanýshylar men qoǵam qairatkerleri qatysty.
Aidos Sarym bul baǵyttaǵy jumys birneshe aidan beri júrgizilip kele jatqanyn atap ótti. Óńirlik filialdardyń kún tártibinde belsendi talqylanady.
«Jumys tobynyń mindeti – barlyq talqylaýlardy, pikirtalastardy, usynystardy, sonyń ishinde ózge sarapshylardyń, qatardaǵy partiialyqtardyń pikirin eskere otyryp, ózektiligin joimaityn, uzaq merzimdi qujat ázirleý. «AMANAT»-tyń jańa Saiasi tuǵyrnamasy onyń negizgi qundylyqtaryn, qaǵidattaryn, partiia músheleri «AMANAT» pen jalpy memleketti qalai kóretindigin aiqyndaýy tiis», – dedi depýtat.
«Eýraziia álemi» qoǵamdyq qorynyń prezidenti Edýard Poletaev saiasi tuǵyrnama, máselen, sailaýaldy baǵdarlamaǵa uqsamaityn jańa saiasi qural ekenin atap ótti.
«Partiia úshin Parlamentte qai depýtat ókildik etetinine, óńirlik filialdardyń qai basshysy óz ornyn saqtap qalatynyna qaramastan, osy tuǵyrnama negizinde Qazaqstan halqy partiianyń negizgi maqsaty men mindetin bilgeni mańyzdy», – dep atap ótti Edýard Poletaev.
Saiasi sholýshy Nikita Shatalovtyń aitýynsha, tuǵyrnamada ómirdiń barlyq salasynda qoǵamnyń ilgerileýine yqpal etetin qundylyqtar belgilenedi.
«Qazirgi tańda birqatar qaýip-qatermen betpe-bet kelip otyrmyz – bul shielenisken geosaiasi jaǵdai, áleýmettik-demografiialyq ahýal, pandemiia. Boljam jasaý jáne tuǵyrnamany ázirleý kezinde munyń bárin eskerý qajet. Barlyǵy naqty sandar men qolda bar bazaǵa súienýi kerek. Saiasattyń zańy – osy», – dedi ol.
Saiasattanýshy Marat Shibýtov Saiasi tuǵyrnamanyń avtorlyq nusqasyn usyndy. Onyń negizinde kontsentrlik sheńber jatyr: «ózim-otbasym-úiim-jumysym-shaǵyn aýdanym-aimaǵym-ortalyǵym».
«Eń bastysy, basty nazar adamǵa aýdarylýy tiis. Solai bola tura, partiia memleketti almastyrmaýy kerek. Alaida partiia óz músheleriniń, qoǵamnyń, sailaýshylarynyń aldynda jaýapty. Naqty iske nazar aýdarý qajet», – deidi saiasattanýshy.
Óz kezeginde, «Strategiia» Áleýmettik jáne saiasi zertteýler ortalyǵynyń prezidenti Gúlmira Ileýova partiianyń jańa mazmun qalyptastyrýy, al onyń ózeginde jalpyǵa ortaq eńbek ideiasy turýy tiis ekenin atap ótti.
«Qazirgi kúni memleket men partiianyń aldynda jańa áleýmettik-ekonomikalyq syn-qaterler tur. Ony eńserý úshin partiia óziniń taldamalyq áleýetin barynsha iske qosýy tiis», – dedi ol.
Qarjy keńesshisi Rasýl Rysmambetov óz sózinde qazirgi jaǵdaidaǵy saiasi partiialardyń róline basa nazar aýdardy. Sarapshy búginde áleýmettik jelilerde aýqymdy aýditoriiasy bar túrli blogerler men belsendiler saiasi partiialarǵa básekelestik jasai alatynyn atap ótti. Sondyqtan partiia óz mazmunyn qalyptastyryp, ony aqparattyq keńistikte ilgeriletýi qajet.
Almatydaǵy pikir almasý syndarly jaǵdaida ótip, kezdesýge kelgen árbir qatysýshysy óz pikirin bildirdi.
Eske sala keteiik, buǵan deiin «AMANAT» Tóraǵasy Erlan Qoshanov Ortalyq apparattyń jáne óńirlik filialdardyń basshylarymen keńes ótkizip, saiasi tuǵyrnamany jańartý jumystary tek «halyq únine qulaq asatyn partiia» formatynda júrgizilýi tiis ekenin atap ótken bolatyn. Erkin pikir almasý, keń saiasi dialog qamtamasyz etilýi tiis.
