Beisenbi kúni Eýropalyq odaq Resei munaiynyń importyna kezeń-kezeńimen tyiym salýy múmkin degen jańalyqtardyń jariialanýyna bailanysty jáne demalys kúnderdiń qarsańynda munai baǵasy qymbattady, dep habarlaidy QazAqparat tilshisi Reuters-ke silteme jasap.
Beisenbi kúni Brent markaly munai fiýchersteri 2,92 dollarǵa nemese 2,68%-ǵa ósip, barreli 111,70 dollarǵa jetti. AQSh-tyń WTI munai fiýchersteri 2,70 dollarǵa nemese 2,59%-ǵa kóterilip, barreli 106,95 dollar deńgeiinde boldy.
Bul - sáýir aiynyń basynan bastap eki kelisimsharttyń alǵashqy aptalyq ósimi. Birneshe apta boiy baǵalar 2020 jyldyń maýsymynan keiin alǵash ret qubylmaly bolyp otyr.
«Kezeń-kezeńmen salynǵan tyiym eýropalyq satyp alýshylardy balama kózderdi izdeýge májbúr etedi, olardyń bir bóligi jaqyn bolashaqta strategiialyq munai qoryn paidalana bastaidy. Biraq bolashaqta jer astynan kóbirek jetkizý qajet bolady», - dedi Lipow Oil Associates-ten Endriý Lipoý Hiýstonda.
Agenttiktiń habarlaýynsha, álemdegi eń iri saýda úileri kelesi aida memleket baqylaityn reseilik munai kompaniialarynan munai men otyn satyp alýdy azaitýdy josparlap otyr.
