Sailau Talks-2021 sharasynda sarapshylar búgingi sailaý barysy týraly aitty, dep habarlaidy QazAqparat.
«Kez kelgen sailaý – azamattyq jaýapkershilik. Sailaýǵa qatysý úshin ózimiz qai ýchaskege qaraitynymyzdy eGov.kz portalynan da, ákimdik saitynan da tekserip aldyq. Ol týraly SMS-habarlamalar da keldi. Búgin tańerteń daýys berýge barǵanda baiqaǵanym, volonterler kóp júr. Olar qys mezgili bolǵanyna qaramastan dalada turyp jumys isteýde. Olar bizge jol kórsetip, qai jerden kirip, qai jerde daýys beretinimizge baǵyt-baǵdar berip turdy. Saǵat 08:20-da sailaý ýchaskesine barǵan kezde ol jerde ájeptáýir adam jinalyp qalǵanyn kórdim. Bir adam sailaý ýchaskesin shatastyryp alypty. Ol óz ýchaskesi qaida ekenin anyqtap, sol jaqqa qarai ketti. Bul da – azamattyq jaýapkershilik», - deidi Qazaqstan strategiialyq zertteýler institýtynyń bólim basshysy Alýa Joldybalina.
Al «Team Qazaqstan» jastar qozǵalysynyń kóshbasshysy Ashat Sadyrbai sailaý ýchaskelerinde barlyq sanitarlyq talaptar saqtalǵandyǵyn aitty.
«Osyndai qiyn kezeńge qaramastan sanitarlyq talaptardy saqtai otyra sailaýdy uiymdastyryp jatqan uiymdastyrýshylardy jumysyn erekshe aityp ótý kerek. Sailaý ýchaskesine kirgen kezden bastap dene qyzýymyzdy ólshep, qolymyzǵa meditsinalyq qolǵap berdi jáne áleýmettik araqashyqtyq saqtalýyn qadaǵalady. Men tańerteń sailaýǵa barǵanda daýys berý jáshigi ortasyna deiin tolyp qalǵan, iaǵni sailaýǵa kelýshilerdiń sany tańnan beri kóp bolǵandyǵyn bildiredi. Sailaý mádenieti durys baǵytqa qarai qalyptasyp kele jatyr», - deidi ol.
