Memleket halyqtyń qai sanatyna kómek berýi tiis? Eńbekke qabiletti azamattardyń memleketke qol jaiýynyń sebebi nede? Muqtajdyqty azaityp, masyldyqty qalai eńserýge bolady? Osy máseleler tóńireginde Eurasian Center for People Management direktory Erbol Ismailov pikir bildirdi, dep habarlaidy QazAqparat.
«Liter» gazetinde jariialanǵan maqalasynda sarapshy deni saý ári eńbekke qabiletti adamdardyń «maǵan kómek kórsetilýi kerek» degen talappen narazylyq bildiretinine tańǵalatynyn aitady. Onyń oiynsha, Qazaqstandaǵy jáne postkeńestik elderdegi halyq keide memleketti jeke monolitti aǵza, aqshanyń astynda jatqan ári qarapaiym turǵyndarǵa kómekteser kezde sarań «qubyjyq» dep esepteidi-mys.
«Is júzinde aqsha salyq túsimderinen alynatynyn eskerý kerek. Iaǵni, jumysqa baratyn adamdar tabysynyń bir bóligin biýdjetke jiberedi. Dál osy rette 16 jastan bastap jumys isteitin meniń sanamda bir suraq týyndaidy. Nege men kúnine 8-10 saǵat jumys istep, eńbekke qabiletti adamdar úshin aqsha berýim kerek?» -deidi sarapshy.
Erbol Ismailovtyń aitýyna qaraǵanda, memlekettiń basty mindetteriniń biri – tiimdi áleýmettik saiasat. Sarapshy memleket óz-ózin aqshamen qamti almaityn azamattardy qamqorlyǵyna alýy kerek dep esepteidi.
«Múmkindigi shekteýli adamdar, jasóspirimder álemniń damyǵan elderiniń bárinde qamqorlyqqa alynǵan. Biraq bizde keibir jaýapsyz adamdar da qamqorlyqqa alynatyndar sanatyna engisi bar. Páter taratyp, qaryzyn keshirip, irikteýsiz jumysqa alsaq, biz tabysy men shyǵynyn eseptep, aqshasyn únemdep, alǵa umtylǵan adal adamdardyń jigerin qum etemiz. Sol úshin barlyǵyna teń múmkindik jasaý kerek. Elimiz damyp, ekonomikamyz ósýi úshin bizge bilikti ári deni saý azamattar qajet. Sondyqtan, win-win qaǵidaty negizinde memleket balabaqsha salyp, orta bilimge qarajat bóledi, meditsinalyq kómek kórsetedi. Bazadan basqa memleket jumyssyzdyqpen kúresýi kerek. Balyq emes, qarmaq taratýy kerek. Iaǵni, jumyspen qamtý ortalyqtaryn ashyp, mamandardy qaita daiarlańyz, úzdiksiz bilim berý kýrstaryn ashyńyz, bos jumys oryndary jármeńkelerin uiymdastyryńyz, monitoring júiesin quryńyz jáne kásipkerlik qyzmetti yntalandyryńyz», - deidi sarapshy.
Erbol Ismailovtyń pikirine qulaq assaq, azamattarda memleket demeýshi degen túsinik qalyptasyp qalǵan.
«Jemqorlyqqa qarsy daýlardy qarasańyz, keibir laýazymdylar milliondaǵan teńgemen, tipti dollarmen ustalyp jatady. Mine, osy rette bizge ashyqtyq jetispeidi. Adamdar «eger belgili bir kúdikti jobaǵa osynshama aqsha bólinse, onda onyń kishkene ǵana bóligin – meniń ákeme, bolmasa zaýyttyń bir jumysshysyna, stýdentke nege bólmeske» dep oilaidy. Sondyqtan, munda sheshim memlekettik shyǵyndardy taratýdaǵy ashyqtyqta der edim. Jalpy, jaýapkershilikti kúsheitip, qymbat jobanyń ashyqtyǵyn qamtamasyz etý kerek. Jastar ol qarajattyń qaida jumsalǵanyn bilýi tiis. Mektepte belgili bir balanyń kásipke beiimi, alǵyrlyǵy, ótkirligi, bastamashyldyǵy baǵalana bermeidi. Ýniversitette de sol. Eski júie bárin bir deńgeide ustap, tilalǵysh etkisi keledi. Bul - sovettik paiymnyń qaldyǵy. Tejei berýdiń aqyry masyldyqqa tireledi. Bul - óte kúrdeli protses», - deidi sarapshy.
