Atyraý oblysynda mas er adam aǵasynyń úiin órtep jiberdi, dep habarlaidy QazAqparat.
Oblystyq Politsiia departamenti baspasóz qyzmetiniń málimetine súiensek, oqiǵa 3 qazanda Qyzylqoǵa aýdanynda bolǵan.
«Aýdandyq politsiia bólimine saǵat 17:30 shamasynda Oiyl aýyldyq okrýgine qarasty eldi mekenderdiń birinde turǵyn úi órtengeni týraly habar túsken.
Aryzdanýshy áieldiń aitýynsha, kúieýiniń inisi ishimdik ishken mas kúide úidiń ishine janarmai shashyp, órtegen. Órt saldarynan turǵyn úi tolyǵymen janyp ketken. Turǵyn úidiń ieleri janyp jatqan baspanadan shyǵyp úlgergen», - dep habarlady departamenttiń baspasóz qyzmetinen.
Oqiǵa ornyna tergeý toby men tótenshe jaǵdailar bóliminiń qyzmetkerleri jedel jetip, 55 jastaǵy kúdiktini ustaǵan. Belgili bolǵandai, kúdikti órt qoiý sebebin otbasylyq kikiljińniń saldarymen túsindirgen.
Qazir ustalǵan kúdiktige qatysty QR Qylmystyq kodeksiniń 202-babynyń 2-bóligimen (Bótenniń múlkin qasaqan joiý nemese búldirý) sotqa deiingi tergeý júrip jatyr.
