Eýropalyq quqyq jáne adam quqyqtary institýtynyń direktory Marat Báshimov QR Prezidenti Qasym-Jomart Toqaevtyń sybailas jemqorlyqqa qarsy kúres máseleleri jónindegi keńeste sóilegen sózine orai pikir bildirdi, dep habarlaidy QazAqparat.
«Búgin Prezident Qasym-Jomart Toqaev elimizdiń ulttyq qaýipsizdigine - jemqorlyqpen kúres máselesine qatysty keńes ótkizdi. Bul óte mańyzdy. Óitkeni, koronavirýs indetine kezinde halyq jemqorlyqtyń kez kelgen faktisin óte aýyr qabyldap otyr. Sondyqtan jemqorlyqpen kúreske baǵyttalǵan sharalar da soǵan sai júrgizilýi tiis. Memleket basshysy da: «Sybailas jemqorlyqqa qarsy kúres – elimizdiń strategiialyq damýyndaǵy negizgi basymdyqtardyń biri« dep naqty aitty. Iaǵni, elimizdegi jemqorlyqty joiý - Prezidenttiń naqty ustanymy ekendigine senimim mol», - dedi ol.
Osy rette institýt basshysy Qazaqstan bedeldi halyqaralyq GREKO uiymyna, iaǵni sybailas jemqorlyqqa qarsy memleketter tobyna múshe ekendigin aitady.
«Bul Sybailas jemqorlyqqa qarsy is-qimyl jónindegi Eýropa keńes elderiniń tájiribelerin qabyldaýǵa jáne olarmen yntymaqtastyqta jumys isteýge múmkindik beredi. Árine, elimizde sybailas jemqorlyqtyń tamyryna balta shaýyp, túbegeili joiýǵa baǵyttalǵan jumystar júrgizilip te jatqany belgili. Máselen, qol astyndaǵylardyń jemqorlyq áreketteri úshin basshylaryn qyzmetinen bosatý qaǵidaty engizildi. Alaida, jemqorlyq áli de tyiylar emes. Ony kúndelikti BAQ betinen kórip, bilip otyrmyz», - dedi Marat Báshimov.
