Qaraǵandy oblysynyń basshysy Erlan Qoshanov Saran qalasy ákimi laýazymyna osyǵan deiin Oktiabr aýdanynyń ákimi qyzmetin atqaryp kelgen Erjan Temirhanovty taǵaiyndady, - dep habarlaidy "Ult aqparat" oblystyq ákimdiktiń saityna silteme jasap.
Erjan Temirhanuly 1980 jyly dúniege kelgen. Eki joǵary bilimi bar. Birinishisi, zań bilimin Qaraǵandy zań institýtynda 2002 jyly alǵan. Ekinshi joǵarǵy bilimin E.A. Bóketov atyndaǵy Qaraǵandy memlekettik ýnivarsitetinde "Qarjy" mamandyǵy boiynsha 2007 jyly alǵan.
Óziniń eńbek jolyn ol 1997 jyly Almaty qalasy boiynsha kedendik baqylaý departamentinde bastaǵan. 2005-2008 jyldar aralyǵynda "Terma-Aqsai" qurylys kompaniiasynyń basshysy qyzmetin atqarǵan. 2013-shi jylǵa deiin Qaraǵandy oblysynyń kásipkerlik jáne ónerkásip basqarmasynyń basshysy, sonan soń Qaraǵandy qalasy ákiminiń orynbasary qyzmetterin atqarǵan. 2013-shi jyldan bastap Oktiabr aýdanynyń ákimi laýazymynda qyzmet etken.
Saran qalasy ákiminiń ornyna Erjan Temirhanovtyń kandidatýrasyn jergilikti máslihat depýtattary bir aýyzdan quptady.
Onyń aldynda bul qyzmette bolǵan Anatolii Shkarýpa búgin oblys ákiminiń orynbasary qyzmetine taǵaiyndaldy. Ol TKSh, TJ jáne energetika salalaryna jetekshilik etetin bolady.
"Meniń oiymsha Anatolii Valerii uly Saran qalasy ákimi qyzmetin jaqsy atqardy. Qalanyń damýy men jetilýinde oń qadamdar bar, sizder baiqaǵan bolarsyzdar. Qazir endi biz jańa ákimge oblystan kómek kórsetetin bolamyz. Men qyzmetime kirisken kúnnen bastap Saran qalasyndaǵy jylytý qazandyǵynyń problemasymen ainalysýdamyn. Osyǵan deiin Saranda bolyp qaitqanmyn, joldar, aýlalarǵa qatysty problemalar bar ekenin bilemin. Jańa ákim osy máselelerdi tereńirek bilgenin qalaimyn. Bir-eki aidan soń kezdesip, ol jaily tolyǵyraq áńgimelesemiz", - dedi oblys ákimi Erlan Qoshanov.
Óz kezeginde Erjan Temirhanov aimaq basshysyna oǵan artyp otyrǵan senimi úshin alǵysyn bildirip, alǵa qoiylǵan mindetterdi oryndaýǵa ýáde berdi.
