Japoniiadaǵy eń úlken qysqy merekelerdiń biri bolyp sanalatyn Sapporodaǵy qar festivali beisenbide onlain ashyldy, dep habarlaidy KYODO NEWS.
Japoniianyń soltústigindegi basty aral Hokkaidoda ótetin festivalde ádette 200-ge jýyq muzdan jasalǵan músin qoiylady.
1950 jyldan beri ótkizilip kele jatqan festival biyl alǵash ret áldeqaida shaǵyn bolyp ótpek. Bul joly adamdar qala ortalyǵyna jinalmaidy, kerisinshe qala mańyna kórmeler ornalastyrylady.
Festivaldi uiymdastyrýshylar veb-saitqa 28 aqpanǵa deiin músinderdiń qalai jasalǵanyn kórsetetin fotosýretter men beinerolikterdi ornalastyrady jáne shara týraly tarihi aqparat beredi.
Keibir fotosýretterde qala boiynsha ornalasqan tórt qarly músin beinelengen, sonyń ishinde tanymal virtýaldy ánshilerdiń biri Hatsýne Miký, ekinshisi - Meidzi dáýirinde (1868-1912) Sapporo aýylsharýashylyq mektebin qurýǵa kómektesken amerikalyq pedagog Ýiliam Smit Klark bar.
Aita ketken jón, Hokkaido sheteldik saiahatshylar úshin tanymal orynǵa ainalýda jáne qar festivali 2019 jyly 2,74 million kelýshini qabyldap, rekordtyq kórsetkishke jetken. Biraq ótken jyly olardyń sany koronavirýs saldarynan 2,02 millionǵa deiin azaidy.
