Qazaqstan Respýblikasy Úkimetiniń qaýlysymen Erjan Jumatuly Jylqybaev QR eńbek jáne halyqty áleýmettik qorǵaý vitse-ministri qyzmetine taǵaiyndaldy. Bul týraly QR Premer-Ministriniń baspasóz qyzmeti habarlaidy.
Aita ketsek, Erjan Jylqybaev 1982 jyly Ońtústik Qazaqstan oblysy Tólebi aýdanynyń Lenger qalasynda dúniege kelgen. Ońtústik Qazaqstan ýniversitetin, Qazaqstan Respýblikasy Prezidentiniń janyndaǵy Memlekettik basqarý akademiiasyn, S. Amanjolov atyndaǵy Shyǵys Qazaqstan memlekettik ýniversitetin támamdaǵan.
Eńbek jolyn 2003 jyly Ońtústik Qazaqstan oblysynyń Ekonomika departamentiniń bas mamany bolyp bastaǵan. 2006 jyly Qazaqstan Respýblikasy Premer-Ministri Keńsesiniń bas sarapshysy bolyp taǵaiyndalǵan.
2007 jyly QR Ekonomika jáne biýdjettik josparlaý ministrliginiń Ekonomika jáne biýdjettik josparlaý departamentiniń bólim basshysy bolyp eńbek etken. 2009–2011 jyldary — Shyǵys Qazaqstan oblysy ákiminiń apparat basshysynyń orynbasary. 2011–2012 jyldary — Semei qalasy ákiminiń orynbasary.
2012–2015 jyldary — Shyǵys Qazaqstan oblysy ákiminiń apparat basshysy.
2015–2016 jyldary — Qazaqstan Respýblikasy Prezidenti Ákimshiliginiń memlekettik baqylaý jáne uiymdastyrý-aimaqtyq jumys bóliminiń memlekettik inspektory.
2016 jyldyń mamyr aiynan bastap qazirgi tańǵa deiin Almaty qalasy Medeý aýdanynyń ákimi laýazymyn atqarǵan.
