Aqtóbe oblysynda jumys berýshiler qyzmet oryndaryn usynǵanymen, jumyssyzdar bas tartýda. Búgin baspasóz máslihatynda atalǵan óńirdiń ákimi Berdibek Saparbaev osylai málim etti, dep habarlaidy QazAqparat.
«Bos jumys oryndary men jumyssyzdar sanyn salystyrsaq, usynylǵan qyzmetter artyqtaý, iaǵni eńbek naryǵynda jumys oryndary barshylyq. Jalpy, jumyssyz adamdarǵa jalaqy kólemi nemese eńbek jaǵdaiy unamaidy. Bul jaiynda ótkizilgen eńbek jármeńkeleri nátijesi boiynsha anyqtadyq. Óńirdegi jumys berýshiler qyzmet oryndaryn usynǵanymen, ókinishke qarai, jumyssyzdar bas tartady», - dedi B. Saparbaev elordada Ortalyq kommýnikatsiialar qyzmetindegi baspasóz máslihatynda.
Onyń sózine qaraǵanda, Aqtóbe oblysynda resmi túrde tirkelgen jumyssyzdar sany 23 myńdy qurady. «Biraq olardyń sany jyl saiyn azaiyp keledi», - dedi ol.
Oblys ákiminiń aitýynsha, ekonomika ósimi men áleýmettik turaqtylyq óńirdegi jumyspen qamtýdy saqtap qalýǵa múmkindik berdi. Jumyssyzdyq 4,8 paiyz deńgeiinde. Ótken aida 15,2 myń jańa jumys orny quryldy, onyń 75 paiyzy turaqty jumys oryndaryna jatady. Jyl sońyna deiin 1,3 myń jańa jumys orny qurylmaq.
Budan buryn habarlanǵandai, aǵymdaǵy jyldyń toǵyz aiynda Aqtóbe oblysynyń ekonomikalyq ósimi bes paiyzdy qurady.
