Jambyl oblysynyń ákimi Berdibek Saparbaev Jańatastaǵy páter órtinen kóz jumǵan bes balanyń ata-anasy men týystaryna baryp, Memleket basshysynyń atynan kóńil aitty, dep habarlaidy "Ult aqparat".
Oblys ákimi marqumdardyń ata-anasynyń qara shańyraǵy ornalasqan Talas aýdany, Úsharal aýylyna arnaiy barǵan. Ol týraly aimaq basshysy Instagram men Facebook-tegi paraqshasynda jazdy.
«Búgin Talas aýdanynyń Úsharal aýylynda boldym. Jańatastaǵy órt saldarynan kóz jumǵan balalardyń ata-anasy qazir osyndaǵy qara shańyraǵynda. Ábdimálikovter otbasynyń qaiǵysyna ortaqtasyp, Memleket basshysynyń atynan kóńil aittym. Prezident tapsyrmasyna sáikes, qara jamylǵan januiaǵa jan-jaqty kómek kórsetilýde»,-dep atap ótken óz jazbasynda Berdibek Saparbaev.
Esterińizge sala ketsek, Jambyl oblysy Sarysý aýdany Jańatas qalasyndaǵy 2 yqshamaýdandaǵy 5 qabatty turǵyn úidiń 3-shi qabatynda órt bolyp, 16 sharshy metr aýmaqty sharpydy. Órt saldarynan páterde úlkenderdiń qaraýynsyz qalǵan 2015, 2016, 2017, 2019 jáne 2020 jyly dúniege kelgen bes sábi tútinge ýlanyp, jedel túrde aýrýhanaǵa jetkizildi. Alaida araǵa biraz ýaqyt salyp, barlyǵy kóz jumdy. Aldyn ala málimet boiynsha, Jańatasta páterdegi órt tez tutanǵysh materialdyń betine ashyq ot kóziniń túsýinen týyndaǵan.
Prezident Jańatas qalasynda qaza bolǵan balalardyń ata-analaryna kóńil aitty.
