Jambyl oblysynyń ákimi Berdibek Saparbaevtyń tóraǵalyǵymen ótken keńeste memlekettik satyp alýlardaǵy, qurylys-montaj jumystaryndaǵy jáne ónerkásip sektoryndaǵy jergilikti qamtý úlesin arttyrý máseleleri talqylandy, dep habarlaidy "Ult aqparat".
Osy oraida Úkimettiń keńeitilgen otyrysynda Memleket basshysy Qasym-Jomart Toqaev jaýapty tulǵalarǵa tiisti tapsyrma júktegen bolatyn.
Oblystyq kásipkerlik jáne indýstrialdy-innovatsiialyq damý basqarmasynyń basshysy Aspandiiar Seisebaevtyń aitýynsha, memlekettik satyp alýlardaǵy jergilikti qamtý úlesi 84 paiyzdy quraidy. Bul kórsetkish ónerkásiptiń «Qarapaiym zattar ekonomikasyna» qatysty alty baǵyt boiynsha 74 paiyzdy, qurylys-montajdaý jumystarynda 86 paiyzdy kórsetken.
Memlekettik satyp alý basqarmasynyń basshysy Baqytjan Júnisbekov memlekettik satyp alýdaǵy negizgi mindetter retinde jergilikti qamtý úlesin arttyrý boiynsha eseptilik, ónim jetkizýshilerdiń jergilikti qamtýdyń eń joǵary úlesine degen múddeliligi, sondai-aq otandyq óndirýshilerdi memlekettik qoldaý bolyp tabylatyndyǵyn tilge tiek etti.
«Ótken jyldyń basynda biz qurylystaǵy jergilikti qamtý úlesin 90 paiyzǵa deiin jetkizýge keliskenbiz. Bul mindetteme oryndalmady. Basqarma basshylary turaqty túrde tiisti oryndarǵa hat jiberetinderin aitady.
Demek, odan keiin bul eshkimdi qyzyqtyrmaidy, jaǵdai qadaǵalaýsyz qalady. Sondyqtan, nátije joq. Óndirýshiler negizinen Tarazda ornalasqan, biraq olarmen jergilikti qamtýdy arttyrý boiynsha tiisti deńgeide jumys júrgizilmeidi. Qalalyq ákimdik, oblystyq basqarmalar jáne óńirlik kásipkerler palatasy ózara tyǵyz bailanysta jumys isteýi tiis. Ázirge ondai júie baiqalmaidy», - dedi oblys ákimi.
Sondai-aq, Berdibek Saparbaev jergilikti qamtýda taýarlar assortimentin keńeitý qajettiligi týraly basa aitty. «Tek qiyrshyq tas pen shaǵaldy paidalanýǵa qanaǵattanbai, jańa taýarlar men materialdar óndirisin jolǵa qoiýǵa umtylý kerek», - dep eskertti óńir basshysy.
