Aqtóbede jastar isi jónindegi keńestiń otyrysy ótti. Óńir basshysy Berdibek Saparbaev qyzdar arasyndaǵy tóbeles pen qyzdardyń jigitterdi sabaý deregi jii tirkeletinin aityp, jumysty kúsheitýdi tapsyrdy, dep habarlaidy "Ult aqparat".
Aqtóbe halqynyń 27 paiyzyn jastar quraidy. Oblys halqynyń 222 myńy jastar bolsa, onyń 51 myńnan astamy orta arnaýly nemese joǵary oqý ornynda bilim alady. Óńirde 69 jastar isi jónindegi komitet jumys istep tur. Aqtóbe oblystyq ákimdiginde ótken jastar isi jónindegi keńeste jastardy jumyspen qamtý, bos ýaqyttaryn tiimdi paidalaný, olardyń belsendiligin arttyrý sóz boldy. Bul salaǵa jyl saiyn 480 million teńgeden astam qarjy bólinedi. Degenmen jyldyń qorytyndysy tyńdalǵan keńeste kemshilikter tizbekteldi.
«Sport, mádeni ǵimarattar bos turmaýy qajet. Olar tańnyń atysy, kúnniń batysyna deiin jumys isteýi kerek. «Demalys, mereke kúnderi keshkilik qaida baratynymyzdy bilmeimiz» dep aitady. Jastar túngi klýbta júredi, tóbelesedi. Aqshasyn beker shashady. Sol kúshi men qarjysyn densaýlyǵyna, oi-óresin kóterýge jumsasa, qyz-jigitterdiń bolashaǵy jaman bolmaidy. Ókinishtisi, túngi saǵat 3-4 bolǵanda jastar klýbtan shyǵyp, tóbelesedi. Qyzdar qyzdarmen tóbelesedi, qyzdar jigitterdi sabaidy. Keiingi kezde sondai derek jiilep barady. Osy máseleni zerttep, ata-analarmen jumysty kúsheitý kerek. Kóbi kolledj stýdenti eken. Ata-anasy «balam, qyzym oqyp júr, bári jaqsy» dep oilaidy. Zeinetaqy, járdemaqysynan jyryp, balasyna jiberedi. Al olar qalada qydyryp júredi. Sony baqylyp, jumysty jandandyrý kerek», - dedi Berdibek Saparbaev.
Óńir basshysy kez kelgen is-sharanyń nátijesi bolýyn tapsyrdy. Máselen, «Halyq qaýipsizdigin qamtamasyz etý» jobasy aiasynda jumys júrgizilip, jalpy qylmys 28 paiyzǵa azaidy. Biraq jastar arasyndaǵy qylmys biyl 43 paiyzǵa ósti. Úsh adam qaza tapty. Al zorlyq 16-dan 23-ke jetti. Ósim bul baǵytta da bar.
«Tóbelesetin jastardyń barlyǵyn 15 kúnge qamaý kerek. Ata-anasyn shaqyrtyp, olardyń aty-jónderin baspasózge jariialaý kerek. Sol kezde tártip bolady. Ata-ana balasynyń, qoǵamnyń aldynda jaýapkershiligin seziný kerek. Bizde oqý ornyna, bilikke, politsiiaǵa júk artyp qoiǵan», - dedi B.Saparbaev.
