Jambyl oblysy Qordai aýdanynda bolǵan jappai tártipsizdikter kezinde bassaýǵalap kórshi Qyrǵyzstan aýmaǵyna ótip ketken 8 myńǵa jýyq qazaqstandyq elge qaitaryldy. Bul týraly 11 aqpanda Nur-Sultandaǵy Úkimet otyrysy barysynda Jambyl oblysynyń ákimi Berdibek Saparbaev habarlady. Ákim oblystaǵy qazirgi jaǵdaidy "turaqty" dep sipattady.
"Eki kúnniń ishinde segiz myńǵa jýyq azamat (Qyrǵyzstannan Qazaqstanǵa) qaitaryldy. Kesheden bastap mektep, balabaqshanyń barlyǵy burynǵydai jumys istep jatyr. Barlyq saýda dúkenderi de jumysyn bastady" dedi ol.
Sonymen birge Saparbaev Qordaidaǵy oqiǵalar kezinde 19 politsiia qyzmetkeri zardap shekkenin aitty.
"Bes kúnniń ishinde dárigerdiń kómegine 178 adam júgingen, sonyń 19-y – quqyq qyzmetkerleri. On adam qaza tapty. Qurban bolǵandardyń barlyǵynyń otbasyna járdem kórsetilip jatyr" dedi ákim.
Saparbaevtyń aitýynsha, qazirgi kezde Qordai aýdandyq aýrýhanasynda 13 adam emdelip jatyr, taǵy 20 adam – Almaty aýrýhanasyna jatqyzylǵan. Buǵan qosa sheneýnik Qyrǵyzstan aýrýhanasyndaǵy qazaqstandyqtardyń elge jetkizilgenin habarlady.
"Qyrǵyzstanda bolǵan adamdardy Almaty men Tarazǵa jetkizdik. Qazir onda (Qyrǵyzstanda – red.) eshkim qalǵan joq" dedi ákim.
Úkimet otyrysynan keiin jýrnalister saýalyna jaýap bergen oblys ákimi qazirgi ýaqytta Qordai aýdanynda jappai qaqtyǵys saldarynan kelgen shyǵyn kólemi anyqtalyp jatqanyn, onyń esebi shyqqan soń ziian shekkenderde ótemaqy tóleý týraly úkimetke usynys engiziletinin málimdedi.
Qordaidaǵy oqiǵalar memlekettiń áleýmettik saiasaty sátsiz bolǵanyn bildirmei me degen saýalǵa Saparbaev "áleýmettik saiasat eshqandai sátsiz bolǵan joq, bul Qazaqstanda ǵana emes, basqa elderde de bolatyn jaǵdai" dep jaýap berdi. Saparbaev oqiǵany "ultaralyq qaqtyǵys" degen sipattaýmen kelispeitinin aitty. "Bul jerde ultaralyq másele joq, bul turmystyq daýdan týyndady, jaqyn arada naqty bir sheshim shyǵaryp, tiisti shara qoldanamyz" dedi oblys ákimi.
Dúisenbi kúni Qazaqstan prezidentiniń jarlyǵymen premer-ministrdiń orynbasary qyzmetindegi Berdibek Saparbaev Jambyl oblysynyń ákimi bolyp taǵaiyndalǵan. 11 aqpanda Saparbaev Jambyl oblysyndaǵy jappai qaqtyǵystardan keiin qurylǵan úkimettiń arnaiy komissiiasynyń jetekshisi bolyp qalatynyn aitty.
Aqpannyń 8-ine qaraǵan túni Jambyl oblysy Qordai aýdanynda bolǵan jappai qaqtyǵystar saldarynan, resmi derek boiynsha, 10 adam qaza taýyp, ondaǵan adam jaralandy. Jappai tártipsizdikter Qyrǵyzstanmen shekaraǵa jaqyn ornalasqan, negizinen etnikalyq dúngender turatyn Masanchi, Sortóbe, Aýqatty aýyldarynda bolǵan. Janjal barysynda turǵyndar menshigindegi ondaǵan ǵimarat pen ózge de dúnie-múlik órtenip, búlingen.
Janjaldan soń myńdaǵa adam Qazaqstannan Qyrǵyzstanǵa qashyp ótken. 9 aqpanda Qazaqstan biligi Qyrǵyzstanǵa ótip ketkenderdiń keibiri úilerine orala bastaǵanyn málimdedi.
Halyqaralyq basylymdar etnikalyq qaqtyǵys dep sipattaǵan janjaldan keiin úkimet arnaiy komissiia quryp, aýdanda tótenshe jaǵdai jariialandy. Bilik Qordaidaǵy oqiǵalardy "turmystyq janjal" dep atap, oǵan bailanysty 25 qylmystyq is qozǵalǵanyn habarlady.
