Jambyl oblysynyń ákimi Berdibek Saparbaev barlyq qarjylyq jáne infraqurylymdyq resýrstardy jumyldyrýdy tapsyryp, qaýipti infektsiia órshi túsken jaǵdaida barynsha daiyn bolýǵa shaqyrdy, dep habarlaidy "Ult aqparat".
Oblystyq jedel shtabtyń kezekti otyrysynda Densaýlyq saqtaý basqarmasynyń basshysy Áset Qaliev meditsinalyq mekemeler 100 paiyz daiyn ekenin aitty.
Oblysta 2530 tósek-oryn jasaqtalǵan, onyń 253-i jansaqtaý bólimine tiesili. Meditsinalyq mekemelerde ókpeni jasandy jeldetýge arnalǵan 253 qural, 706 ottegi ballony, 542 ottegi kontsentratory, 1009 impýlstik oksimetr, 19 tsifrlyq rentgen apparaty, 10 kompiýterlik jáne 7 magnittik-rezonanstyq tomograf bar. Jaqyn arada taǵy 74 ÓJJ, jeti kompiýterlik tomograf, tórt tsifrlyq rentgen apparaty, tórt ottegi stantsiiasy, sondai-aq 74 birlik jedel-járdem kóligi, segiz jyljymaly meditsinalyq keshen, 100 kópfýnktsiondy tósek jetkiziledi dep kútilýde.
Berdibek Saparbaev barlyq reanimatsiialyq tósekterdi ÓJJ apparatymen qamtamasyz etýdi tapsyrdy.
Oblystyń bas dárigeri ambýlatoriialyq deńgeide de, statsionarlyq deńgeide de dári-dármektiń jetkilikti qory bar ekenin jetkizdi.
Jalpy, 4 410 meditsina qyzmetkerin tartý josparlanyp otyr. Onyń ishinde 882 dáriger, 1764 orta býyn meditsina qyzmetkerleri jáne sonsha kishi býyn meditsina qyzmetkerleri bar. Oblys ákimi men S.D.Asfendiiarov atyndaǵy Ulttyq meditsinalyq ýniversitetiniń rektory arasynda jasalǵan yntymaqtastyq týraly memorandým aiasynda qosymsha 150 maman tartylmaq.
Óńirde jeti PTR zerthanasy bar. Mindet – zerthanalyq zertteýlerdiń tiimdiligin, PTR zerthanalarynyń sany men syiymdylyǵyn arttyrý.
Oblys ákimi áli de mobildi toptardyń jumysyna kóńili tolmaityndyǵyn jetkizdi.
«Ókinishke orai, koronavirýstyq infektsiia qaýpi áli joiylǵan joq. Biz naqty jáne dáiekti túrde áreket etýimiz kerek. Turǵyndar nemqurailylyq tanytqan saiyn, koronavirýsty jeńý múmkin emes. Halyq úilený toilary men mereitoilardy ótkizýdi toqtatpai otyr. Mundai faktilerdi anyqtaýy tiis mobildi toptar eshqandai mardymdy shara qoldanyp jatqan joq, reidterdi tek esep úshin júrgizýde», - dedi oblys ákimi.
Berdibek Saparbaev kezdesýge qatysqan dárihana jelileri ókilderin jaǵdaidyn kez-kelgen baǵytta órshýine daiyn bolý kerektigin, týyndap otyrǵan máseleler týraly ashyq aitýǵa shaqyrdy.
