Aqmola oblysynyń turǵyndarymen kezdesken QR Eńbek jáne halyqtyń áleýmettik qorǵaý ministri Berdibek Saparbaev kópbalaly analarǵa úide otyryp tabys tabýǵa kómektesý qajettigin aitty, dep habarlaidy QazAqparat tilshisi.
«Kópbalaly analar men múgedek balalardy tárbielep otyrǵan analar úshin úide áleýmettik jumys oryndaryn ashý uiymdastyrylady. Bul oraida jergilikti ákimdiktermen jumys júrgizýdemiz. Úide otyryp-aq qarjy tabýǵa bolady. Ol úshin áleýmettik jumys oryndaryn ashýmen birge, suranysqa ie kásipterge qysqa merzimde oqytyp úiretetin kýrstar uiymdastyrylýy kerek», - dedi Berdibek Saparbaev.
Budan bólek, QR Eńbek jáne halyqty áleýmettik qorǵaý ministri áleýmettik sala qyzmetkerleriniń, onyń ishinde bilim berý men densaýlyq saqtaý salasynda jumys isteitin adamdardyń jalaqysy kóteriletinin atap ótti.
«Halyqtyń ál-aýqatyn arttyratyn basty jai - jalaqy mólsheri. 2019 jyldyń 1 maýsymynan bastap bilim berý salasyndaǵy qyzmetkerlerdiń tabysyn 30 protsentke deiin kóbeitý kózdelip otyr. Mektepke deiingi uiymdardyń tárbieshileri, olardyń kómekshileri, internat mekemeleriniń tárbieshileri, ádiskerler, balabaqshalar men kolledjderdiń áleýmettik pedagogteri, psihologtar, qosymsha bilim berý uiymdarynyń qyzmetkerleri, tehnikalyq personaldyń jalaqylary joǵarydaǵy aitylǵan mólsherde kóteriletin bolady», - dedi vedomstvo basshysy.
Sonymen qatar kezdesýde densaýlyq saqtaý uiymdary qyzmetkerleriniń de jalaqysyn 30 protsentke kóterý mejelenip otyrǵany aityldy. Qazir elimizde olardyń sany 29686-ny quraidy. Búgingi tańdaǵy ortasha tabysy - 108 194 teńge. Kútiletin ortasha jalaqy mólsheri - 140 643 teńgege. Jalpy praktika dárigerleriniń, terapevter men pediatrlardyń, orta meditsinalyq personaldyń, kishi jáne ózge de personaldardyń jalaqysy artady. Máselen, kishi personal osy ýaqytqa deiin shamamen 48 861 teńge alyp kelse, ol ústimizdegi jyldyń 1 maýsymynan bastap 63 520 teńgege kóteriledi.
Eske sala keteiik, búgin QR Premer-Ministriniń orynbasary Gúlshara Ábdiqalyqova bastaǵan Úkimet músheleri Aqmola oblysyna jumys saparymen keldi.
Halyqpen ótken kezdesýde Elbasy Nursultan Nazarbaevtyń «Nur Otan» partiiasynyń HVIII sezinde aitqan áleýmettik qoldaýdy kúsheitý, halyqtyń ómir súrý sapasyn jaqsartý baǵytyndaǵy mindetteri túsindirildi.
