Eńbek jáne halyqty áleýmettik qorǵaý ministri Berdibek Saparbaev memlekettik járdemaqyny zańsyz alatyndardyń jazaǵa tartylatynyn aitty, dep habarlaidy Sputnik Qazaqstan tilshisi.
Ministrdiń aitýynsha, úide jumysqa qabileti bar adam bolsa, mindetti túrde jumys isteýi kerek. Osyǵan bailanysty memleketten járdemaqy alatyn azamattarmen áleýmettik kelisimshart jasalady. Oǵan sáikes, belgili bir ýaqyttyń ishinde jumysqa qabiletti otbasy múshelerine jumys usynylady. Sol boiynsha jumysqa turý qajet. Alaida memlekettik járdemaqy alǵysy keletin erli-zaiyptylar ajyrasa salady. Sóitip, tómen tabysty kórsetýge tyrysady.
"Búginde erli-zaiyptylar tómen tabysty kórsetý úshin ajyrasady. Kúieýim joq, aliment tólemeidi, men ózim jumys istemeimin deidi. Negizinde, biz olardyń birge turatynyn bilemiz. Men kúieýiń bar ǵoi desem, ol anda-sanda kelip-ketip turady deidi. Ol kelip-ketip tursa, aqsha berýi kerek qoi. Óziniń balasyna aqsha bermei me?", - dedi Saparbaev jýrnalisterge bergen suhbatynda.
Onyń aitýynsha, ajyrasýdyń kórsetkishi 7 protsentke artqan. Osyǵan bailanysty quziretti memlekettik organdarmen birlesken tekseris jumystary bastalyp ketti.
"Ondai otbasylarǵa qatysty mindetti túrde shara qoldanylady. Aiyppul da bolady. Ataýly áleýmettik kómekti tóleýdi toqtatamyz. Osy siiaqty sharalar qolǵa alynady", - dedi Saparbaev.
Aita ketsek, biyl sáýir aiynyń basynda Qazaqstan prezidenti Qasym-Jomart Toqaev kópbalaly jáne turmysy tómen otbasylardy áleýmettik qoldaýǵa arnalǵan zańǵa qol qoiǵan bolatyn. Atalǵan qujatqa sáikes, ataýly áleýmettik kómek berýdiń mejesi kóterilip otyr. Endi, ai saiynǵy tabysy kúnkóris deńgeiiniń 70 protsentine jetpeitin otbasylar árbir balaǵa 20 789 kóleminde járdemaqy alady. Budan bólek, ata-anasyna tabys pen kúnkóristiń aiyrmashylyǵy tólenedi. Atalǵan tólemder 1 shildeden bastap beriledi.
24 maýsym Aqordada halyqty áleýmettik qorǵaý máselelerine arnalǵan keńes ótti. Jiynda Berdibek Saparbaev ataýly áleýmettik kómek kórsetý kezinde zańbuzýshylyqtar, tipti, alaiaqtyq joldar da anyqtalǵanyn jetkizdi.
Qasym-Jomart Toqaev bul saladaǵy teris áreketterdi joiý úshin eńbek jáne áleýmettik qorǵaý ministrine ataýly áleýmettik kómektiń berilý tártibin retteý jóninde shuǵyl sharalar qabyldaýdy tapsyrdy.
