QR Prezidenti Qasym-Jomart Toqaevtyń tapsyrmalaryn iske asyrý aiasynda QR Premer-Ministriniń orynbasary Berdibek Saparbaev Nur-Sultan qalasyndaǵy birqatar sport jáne meditsinalyq nysandardy aralady. Bul týraly "Ult aqparat" primeminister.kz saityna silteme jasap habarlaidy.
Vitse-premerdiń nysandardy aralaýy qalanyń eski meditsinalyq mekemesi ‒ ortalyq temir jol aýrýhanasyn tekserýden bastaldy. Onyń korpýstary 60 jyl buryn salynǵan ári qatty eskirgen. Osy ýaqytta aýrýhanada bir ret te jóndeý jumystary júrgizilgen joq. Sonymen qatar, meditsinalyq mekemede elordanyń halyq kóp ornalasqan aýdandarynyń biri — Saryarqa aýdanynyń turǵyndaryna qyzmet kórsetiledi.
Ákimdik pen Densaýlyq saqtaý ministrligi bul máseleni 600 orynǵa arnalǵan jańa meditsinalyq keshen salý arqyly sheshýdi josparlap otyr. Bolashaq qurylystyń ýchaskesi anyqtaldy. Memlekettik-jekeshelik seriktestik jobasyn iske asyrý úshin Túrkiiadan investor tartý josparlanýda.
Vitse-premer sondai-aq qaterli isik aýrýlaryn emdeýge joǵary mamandandyrylǵan kómek kórsetetin Kópbeiindi meditsinalyq ortalyqta boldy. Aldyńǵy jyldary onkologiialyq ortalyq «SQ-Farmatsiia»-ǵa 1,3 mlrd teńge kóleminde qaryz bolyp qaldy. Bul jaǵdaidy sheshý úshin arnaiy komissiia quryldy.
Premer-Ministrdiń orynbasary jaýapty memlekettik organdarǵa meditsinalyq ortalyqty naýqastardy emdeýge qajetti dári-dármektermen tolyqtai qamtamasyz etýdi tapsyrdy.
Sonymen qatar, Berdibek Saparbaev «Qazaqstan» sport kesheninde jáne «Tolqyn» olimpiadalyq rezervtegi mamandandyrylǵan balalar-jasóspirimder mektebinde boldy.
«Qazaqstan» SK 2001 jyly salynǵan, kúrdeli jóndeý jumystaryn júrgizý qajet. Búginde muz arenasy jumys isteidi, biraq basseinniń apattyq jaǵdaiyna bailanysty jabyq tur. Jalpy, nysan tolyq jańǵyrtýdy qajet etedi. Memlekettik-jekeshelik seriktestik aiasynda sheteldik investordy tartý josparlanýda. Búginde qajetti rásimder oryndalyp jatyr. Kelesi jyly jumystar bastalady. Qurylysty 2023 jyly aiaqtaý josparlanyp otyr», — dedi elorda ákiminiń orynbasary Baqtiiar Máken.
«Tolqyn» sport mektebiniń shatyry kúrdeli jóndeý jumystaryn talap etedi.
«Jobalyq-smetalyq qujattamany ázirleýge jergilikti biýdjetten qarajat bólindi. Konkýrstyń jeńimpazy anyqtalǵannan keiin biz jumysqa kirisemiz. Jóndeý jumystaryn kelesi jyldyń qyrkúiegine deiin aiaqtaýǵa tyrysamyz», — dep sendirdi B. Máken.
Jumys saparynyń qorytyndysy boiynsha Berdibek Saparbaev Densaýlyq saqtaý ministrligi men qala ákimdigi aldyna birqatar mindetter júktep, Memleket basshysynyń tapsyrmalaryn oryndaý Úkimettiń erekshe baqylaýynda ekenin atap ótti.
Aita ketý kerek, Memleket basshysy jaqynda ótken elordany damytý jónindegi keńeste sporttyq nysandardyń qoljetimdiligin arttyrý jáne meditsinalyq qyzmetterdiń sapasyn jaqsartý jóninde birqatar tapsyrmalar bergen bolatyn.
