Tarazda Altyn Ordanyń 750 jyldyǵyna orai «Talas quryltaiy: tarih pen taǵlym» atty ǵylymi-tájiribelik konferentsiia ótýde, dep habarlaidy "Ult aqparat".
Halyqaralyq is-sharaǵa Qazaqstan Respýblikasy Premer-Ministriniń orynbasary Berdibek Saparbaev, Mádeniet jáne sport vitse-ministri Órken Bisaqaev pen Jambyl oblysynyń ákimi Asqar Myrzahmetov, Halyqaralyq Túrki akademiiasynyń prezidenti Darhan Qydyráli, ǵalymdar, mádeniet jáne bilim salasynyń qyzmetkerleri, JOO oqytýshylary men BAQ ókilderi qatysýda.
«Biyl 24 tamyzda «Ulytaý – 2019» halyqaralyq týristik forýmy kezinde Prezident Qasym-Jomart Toqaev Ulytaýda halyqaralyq deńgeidegi etnografiialyq týrizm ortalyǵyn qurýdy tapsyrǵan edi. Atalǵan jospardy júzege asyrý maqsatynda 2020 jyly Altyn Ordanyń 750 jyldyǵy atap ótiledi. Osy oraida daiyndalǵan keshendi josparǵa sáikes ortalyq deńegeiinde 50-den astam merekelik is-shara ótedi. Bul qatarda otandyq jáne sheteldik ǵalymdardyń qatysýymen halyqaralyq ǵylymi konferentsiia ótkizý, Altyn Ordanyń tarihyna arnalǵan monografiialar men kitaptar shyǵarý, Ulytaý óńiriniń týristik áleýetin ilgeriletý, arheologiialyq qazba jumystaryn júrgizý, derekti film shyǵarý qarastyrylýda. Sondai-aq, Joshy han, Alasha han kesenesine ǵylymi-restavratsiialaý jumystaryn júrgizý, Altyn shoqy taýynyń tóbesindegi Ámir Temir jazýy bar memorialdyq taqtanyń aýmaǵyn abattandyrý kózdelip otyr. Osy is-sharalar nátijesinde elimizdiń mádeni murasyn jańǵyrtý úshin platforma qurylyp, Altyn Ordanyń tarihi-mádeni murasyn nasihattaýdy UNESCO men UNWTO-nyń halyqaralyq baǵdarlamasyna engizýge alǵyshart jasalmaq», - dedi B. Saparbaev.
Konferentsiia barysynda Talas quryltaiynyń jáne Altyn Orda memleketiniń 750 jyldyǵy, Júsip Balasaǵunnyń áigili «Qutadǵý bilik» kitabynyń 950 jyldyǵyna orai mazmundy baiandamalar jasalyp, qatysýshylar paiymdy pikirlerimen bólispek.
