Eńbek jáne halyqty áleýmettik qorǵaý ministri Berdibek Saparbaev kópbalaly otbasylardaǵy ár balaǵa 20 789 teńge qashannan bastap tólenetinin málimdedi, dep habarlaidy "Ult aqparat".
Saparbaevtyń aitýynsha, kúnkóris deńgeii 1 shildege 14 myń 849 teńge bolsa, shildeden bastap 20 789 teńgege kóteriledi. Iaǵni, 1 shildeden bastap ataýly áleýmettik kómekti alatyndar sany 260 myńǵa adamǵa kóbeiip, qazirgi 571 myńnan 830 myń adamǵa deiin ósedi.
"Máselen, tórt balasy bar jalǵyzbasty otbasyn alaiyq. 1 shildege deiin 63 myń teńge ataýly áleýmettik kómekti alatyn bolsa, shildeden bastap 40 myń teńgege kóbeiip, 103 myń 945 teńgege deiin jetedi. Al qosymsha tólemderdi eseptegen kezde, bul otbasynyń bir ailyq jalpy tabysy 114 myń 448 teńgeni quraidy", - dedi jańa ministr úkimet otyrysynda.
Sonymen qatar, shildeden bastap otbasynyń jiyntyq tabysyn eseptegen kezde, kópbalaly otbasylarǵa, "Kúmis alqa", "Altyn alqa" iegerlerine, múgedek balalarǵa tólenetin járdemaqylar men shákirtaqy esepke alynbaidy.
"Buǵan qosa, turmysy tómen otbasynyń balalaryna beriletin járdemaqy mólsheri de ózgeredi. Eger 1 shildege deiin ol 4 myń 834 teńge bolsa, 1 shildeden bastap ár balaǵa 20 789 teńge tólenedi. Bul járdemaqy 18 jasqa deiin, eger balalar joǵary oqý oryndarynda oqityn bolsa, 23 jasqa deiin tólenedi. Oǵan qosymsha ata-anasyna tabystary kúnkóris aiyrmashylyǵyn eseptegende kúnkóris deńgeiinen tómen bolsa onda da olarǵa qosymsha járdemaqy tólenedi", - dedi Saparbaev.
Sondai-aq, ministr áleýmettik kómekti taǵaiyndaǵan kezde, halyqty bekerden beker sandaltpas úshin suralatyn qujattar sany azaiatynyn atap ótti.
"Munyń bári «E-halyq» júiesimen elektrondy túrde júzege asady. Eger keibir málimetter joq bolsa, ata-anaǵa kelýdiń qajeti joq. Jergilikti jerlerde jumyspen qamtý ortalyqtary, ákimshilikter tiisti memlekettik organdarǵa suraý jasap, ózderine qajet málimetti alatyn bolady", - dedi ol.
Onyń aitýynsha, óńirlerdegi otbasylardyń qajettiligin, turmysyn anyqtaý úshin áleýmettik kartalar jasalady. Osylaisha, ár otbasyǵa taldaý jasalyp, eń muqtajdaryna memleketten kómek kórsetiledi.
"Eger januianyń ár múshesine shaqqanda tabys kúnkóris deńgeiinen (70 protsentten - avt.) tómen bolsa, aiyrmashylyq 10 myń teńge bola ma, 7 myń teńge bola ma, sol ata-anasyna qosymsha tólenedi", - dedi Berdibek Máshbekuly jýrnalisterge bergen suhbatynda.
