Resei Federaldy qaýipsizdik qyzmeti (FQQ) 3 sáýir kúni Sankt-Peterbýrg metrosynda lańkestik aktisin uiymdastyrdy degen kúdikpen 27 jastaǵy Ortalyq Aziianyń týmasy Abror Azimovty ustady.
Resei FQQ Qoǵammen bailanys ortalyǵynan TASS agenttigine habarlaǵandai, RF Federaldy qaýipsizdik qyzmeti Sankt-Peterbýrg metropoliteninde bolǵan terroristik aktisi boiynsha Resei Tergeý komiteti (TK) qozǵaǵan qylmystyq is aiasynda dúisenbi kúni Máskeý oblysy Oditsovsk aýdanynda qylmysty uiymdastyrýshylardyń biri, 1990 jyly týǵan Ortalyq Aziia týmasy Azimov Abror Ahralulyn ustady. Ol jankeshti-terrorist (metroda jarylys jasaǵan) Akbarjon Alimovty daiyndaǵan.
Jedel qyzmetkerlerdiń biri kúdiktiden: «Sizdi ne úshin ustaǵanyn bilesiz be?», - dep surady. «Iá», - dedi Azimov. Keiin odan tapansha men eki smartfon tárkilendi.
Tergeý komitetiniń resmi ókili Svetlana Petrenko TK teraktini uiymdastyrýshylardy anyqtaýdy jalǵastyryp jatqanyn málimdedi.
Eske sala keteiik, 3 sáýir kúni Sankt-Peterbýrg metrosynyń «Sennaia ploshad» beketinde jarylys boldy. Saldarynan 14 adam qaza taýyp, 50 adam jaraqattandy. Ajal qushqandar arasynda Qazaqstan azamaty, Sankt-Peterbýrg memlekettik ekonomikalyq ýniversitetiniń stýdenti Maksim Aryshev boldy.
