Sanitarlyq aviatsiia óz patsientterine sapaly qyzmet kórsetýge tiis. Ony dál osy kezde qolǵa alýy kerek. Senatorlar Aqmaral Álnazarova, Nurtóre Júsip jáne Murat Baqtiiaruly Premer-ministrdiń atyna joldaǵan depýtattyq saýalynda osy máseleni kóterdi, dep habarlaidy "Ult aqparat".
Sanaviatsiiaǵa biýdjetten bólingen aqsha kóbinese An-2, Iak-40, An-24 ushaqtaryna ǵana jetedi. Ol ushaqtardyń qyzmet eter ortasha merzimi 40 jyldan asady. Depýtattar olardyń tehnikalyq jaǵdaiy, máselen, shýyly, dirili, ushaq ishindegi temperatýrasy aýyr naýqastarǵa meditsinalyq qyzmet kórsetý jáne tasymaldaý standarttaryna sáikes kelmeitinin atap ótti.
«Sapaly jáne ýaqtyly meditsinalyq kómektiń mindetti sharty naýqastardy tasymaldaýǵa álemdik standarttarǵa jaýap beretin zamanǵa sai ushaqtardy paidalaný ekenin atap ótken jón. Sondai-aq, biýdjet qarjysynan tólenetin ushý ýaqytynyń 1 saǵatyna tarifti ulǵaitýǵa qarjy bólý qajet dep sanaimyz. Bul jańa ári zamanaýi áýe kóliginiń túrlerin paidalaný úshin de mańyzdy. Osy sharalar sanitarlyq aviatsiia qyzmetin odan ári damytý men áleýetin arttyrýǵa sep bolady jáne el turǵyndaryna meditsinalyq kómektiń qoljetimdiligi men sapasyn arttyrýǵa, jalpy ólim-jitimdi azaitýǵa yqpal etedi», - dep atap ótti senator Aqmaral Álnazarova Parlament Senatynyń otyrysynda.
