Sanitariia-karantin pýnktteriniń mamandary halyqaralyq áýejailarda jáne temirjol vokzaldarynda Qytaimen shekaralas memleketter arqyly ótkizý pýnktterinde – 32 456 adamdy tekserdi, dep habarlaidy "Ult aqparat" QR DSM Taýarlar men qyzmetterdiń sapasy men qaýipsizdigin baqylaý komitetine silteme jasap.
Komitettiń málimetinshe, QHR men shekaralas memleketterden kelgen azamattarǵa monitoring jalǵasýda. 2020 jylǵy 6 qańtardan 28 aqpanǵa deiin elimizge 32 456 adam kelgen.
«6 qańtar - 28 aqpan aralyǵynda Densaýlyq saqtaý ministrligi Taýarlar men qyzmetterdiń sapasy men qaýipsizdigin baqylaý komitetiniń sanitariia-karantin pýnktteriniń mamandary halyqaralyq áýejailarda jáne temirjol vokzaldarynda Qytaimen shekaralas memleketter arqyly ótkizý pýnktterinde – 32 456 adamdy qarap-tekserdi.
Kelgen 24 469 adam monitoringige alyndy, 24 432-inen monitoring alynyp tastaldy, sońǵy 14 kúnde kelgen 27 adam meditsinalyq baqylaýda qalady», delingen habarlamada.
1 naýyryzda ystyǵy kóterilgen jáne JRVI belgisi bar 165 adam emdeýge jatqyzyldy, onyń barlyǵy qazir úilerine shyǵaryldy.
Sondai-aq, 23 aqpanda túnde saǵat 2:30-da Nur Sultan qalasyna Tokio qalasynan 20 qazaqstandyq azamat keldi (onyń ishinde 4 adam – «Diamond Princess» japon laineriniń jolaýshysy). Barlyǵy meditsina jáne zerthana tekserýinen ótý úshin aýrýhanaǵa jetkizildi. Olardyń jaǵdaiy qanaǵattanarlyq.
Emdeýge jatqyzylǵandardyń barlyǵynyń synamasy qosymsha baqylaý úshin Almatydaǵy Aiqymbaev atyndaǵy asa qaýipti infektsiialar ulttyq ǵylymi ortalyǵyna jiberildi. Bul ortalyq jańa koronavirýsty PTR-diagnostikalaý ádistemesin igergen.
Respýblikada qoldaýshy terapiia úshin qajetti dáriler men meditsinalyq maqsattaǵy buiymdar jetkilikti, infektsiialyq aýrýhanalarda oqshaýlaýǵa arnalǵan boks oryndar bar, dárigerlik jáne orta meditsina personaly daiyndalǵan.
Bul jaǵdai QR Densaýlyq saqtaý ministrliginiń turaqty baqylaýynda ekenin atap ótý qajet.
Densaýlyq saqtaý ministrligi jańa koronavirýs infektsiiasynyń taralýyn boldyrmaý úshin kelesi aldyn-alý sharalaryn saqtaýdy usynady:
- qoldy, betti sabynmen jii jáne muqiiat jýý kerek;
- qoldy zalalsyzdandyrýda spirtti antiseptik qoldaný kerek;
- adam kóp jinalatyn oryndardan aýlaq bolyńyz;
- naýqas adamdarmen bailanysta bolmaý kerek;
- sýyq tiiý belgisi (ystyq kóterilý, muryn bitelýi, jótel, tamaqtyń aýrýy) paida bolǵan jaǵdaida, turǵylyqty jerińiz boiynsha dáriger keńesin alý qajet.
Resmi aqparatty ministrliktiń áleýmettik jelidegi paraqshasynan bilýge bolady, suraqtar boiynsha táýlik boiy jumys isteitin 1406 nómirli Call-ortalyqqa qońyraý shalýǵa bolady.
