Foto:elements.envato.com
Ulttyq ekonomika ministri Álibek Qýantyrov sán-saltanat salyǵy ne úshin qoldanylatynyn túsindirdi, - dep habarlaidy Tengrinews.kz tilshisi.
"Sán-saltanat salyǵy belgili bir quny qymbat, tipti investitsiialyq quny bar jyljymaityn múlik, kólik jáne basqa da sán-saltanat nysandaryna qoldanylady. Qunyna bailanysty údeme bolady. Mysaly iahtalar, sporttyq avtomobilder, sheteldik villalar, jeke ushaqtar. Bularǵa sán-saltanat salyǵy qoldanylatyn bolady", - dedi ministr OKQ brifinginde.
Álibek Qýantyrov salyqty kólik markalary boiynsha anyqtaý ekitalai ekenin naqtylady.
"Meniń oiymsha, kóliktiń eń tómengi baǵasy týraly másele qaralady. Bul másele Salyq kodeksi aiasynda halyq, sarapshylarmen talqylanady. Shartty túrde joǵary salyq salynatyn kólik quny 100-150 myń dollardan bastalady, múmkin odan da joǵary bolýy múmkin. Biraz gradatsiia bolady. Jyljymaityn múlikke de qatysty. Jyljymaityn múlik sáikesinshe joǵary baǵalanady. Jyljymaityn múliktiń ózi jyljymaly múlikke qaraǵanda qymbatyraq.
Shartty túrde kólik qunyna eń tómengi shekti alaiyq, 150 myń dollar bolsyn, quny 60 million teńgege jýyq kólikter az emes. Men ielerdiń naqty sanyn aita almaimyn. Bireýdiń kóligi million dollar turady. Elimizde mundai kólik ieleri sanaýly ǵana shyǵar. Iahtalar, ushaqtar siiaqty nárselerge de qatysty, meniń oiymsha, mundai adamdar kóp emes", - dep qosty ol.
Sondai-aq, onyń aitýynsha, birneshe jyljymaityn múlik nysan ielerine salyq engizý máselesi qarastyrylyp jatyr.
"Adamnyń 10 nysany bolsa, odan da kóp tóleý kerek shyǵar. Iaǵni, barlyq másele muqiiat qaralyp, talqylanady. Qazir men adam sany týraly statistikany aita almaimyn", - dedi Qýantyrov.
