Búgin «Samuryq-Qazyna» qory Túrkistan oblysy ákimdigine baǵa jetpes tartý jasady. Hoja Ahmet Iassaýi murajaiy, 7000 oryndyq stadion, Oqýshylar saraiy, Kongress-holl jáne «Qazposhta» AQ oblystyq bólimshesiniń ǵimaratyn tegin tapsyrdy, dep habarlaidy "Ult aqparat".
Túrkistandaǵy jańa nysandar qurylysy Qor men Túrkistan oblysy ákimdigi arasynda ótken jyly qol qoiylǵan yntymaqtastyq týraly memorandým aiasynda bastalǵan-dy.
«Jyl basynan beri biz áleýmettik mańyzy bar 6 nysannyń qurylysyna kiristik. Birinshisi – amfiteatr jyl basynda paidalanýǵa berildi, qalǵan beseýin Túrkistan oblysynyń ákimdigine tegin tapsyrýǵa daiynbyz. Qurylys kezinde bizge ákimdik aitarlyqtai qoldaý kórsetkenin atap ótkim keledi», – dedi Qordyń basqarma tóraǵasy Ahmetjan Esimov.
Al oblys ákimi Ómirzaq Shókeev Qorǵa óńirdiń gúldenýine qosqan úlesi úshin alǵys aitty.
«Elimizdiń Tuńǵysh Prezidenti – Elbasy N.Á. Nazarbaevtyń Túrkistandy jańǵyrtý jónindegi tapsyrmasy aiasynda siz basqaryp otyrǵan «Samuryq-Qazyna» qory oblys ortalyǵyndaǵy áleýmettik mańyzy bar nysandar qurylysyn sátti júzege asyrdy», – dedi ol.
Taraptar Túrkistan ólkesin damytýǵa qosylatyn úles týraly jańa memorandýmǵa qol qoidy. Qor óńirdegi gazdandyrý, elektr energetikasy, elektrondyq kommertsiia, poshta qyzmeti, aqparattyq jáne kommýnikatsiialyq infraqurylym salasyndaǵy jobalardy iske asyrýdy jalǵastyrýda. Áleýmettik salany damytýǵa, jergilikti halyqtyń ál-aýqatyn kóterýge basa nazar aýdarylǵan.
H. Iassaýi murajaiynyń ereksheligi – zaldardaǵy ár ekspozitsiia úshin kompozitorlar arnaiy jazǵan mýzyka oinap tur. Munda ǵalym men onyń shákirtteriniń eńbekteri usynylǵan. Biregei arhitektýraǵa ie nysannyń alańy 3000 sharshy metrden asady jáne 3 qabattan turady.
Al 7 myń oryndyq stadion ÝEFA erejesiniń 3-shi sanatyndaǵy fýtbol jarystary men IAAF erejesine sáikes jeńil atletikadan jattyǵýlar ótkizýge arnalǵan.
«Oqýshylar saraiyn» salý arqyly Qor óńirdegi balalardyń mýzykalyq-estetikalyq tárbie alýyna múmkindik syilady.
«Qazposhta» AQ Túrkistan oblystyq filialy ǵimaratynda «Tsifrlyq keńse», ortalyq operatsiialyq aimaq, sálemdeme sýpermarketi, suryptaý poshta bólimshesi, filialdyń bas kassasy bar.
Qor eldiń áleýmettik salasyna basa nazar aýdaryp, únemi qoldaý kórsetedi. Byltyr Arys qalasyn qalpyna keltirýge belsendi qatysyp, 68 áleýmettik nysandy – 16 mektep, 36 balabaqsha, 8 densaýlyq saqtaý, 4 sport nysany, kolledj, temirjol vokzaly, Dańq alleiasy men ortalyq alańdy qalpyna keltirdi.
