«Samuryq-Qazyna» ultyq ál-aýqat qory top-menedjerleriniń jalaqysy qysqardy. Bul týraly qordyń basqarma tóraǵasy Almasadam Sátqaliev aitty, dep habarlaidy QazAqparat.
«Portfeldik kompaniialar basshylarynyń jalaqysy týraly aitar bolsaq, ol kompaniianyń qarjylyq kórsetkishterine orai bekitiledi. Normativter 2016 jyly bekitilip, sodan beri áli ózgergen joq. Syiaqy, syilyqaqy qory jaiynda sóz qozǵasaq, ol da qyzmet kórsetkishterine, jeke nemese korporativtik josparlardyń oryndalýyna tikelei bailanysty. Iaǵni, bul soma da biýdjettermen shekteledi», - dedi Almasadam Sátqaliev.
Sonymen qatar ol táýelsizdi direktorlardyń jalaqysyna qatysty málimettermen bólisti.
«Tanymal, biliktiligi joǵary, halyqaralyq deńgeidegi mamannyń bolýy qyzmetimizdiń ashyqtyǵyn bildiredi jáne halyqaralyq investitsiialyq qaýymdastyqtyń senimin qamtamasyz etedi. Táýelsiz direktorlar barlyq aktsionerlerdiń, onyń ishinde memlekettiń de qorǵanysyn qamtamasyz etetindigin túsiný qajet. Óitkeni, olar úshin bedel táýekeli, menedjment sapasy, ashyqtyq máseleleri, qatelik jibermeý – negizgi jumys. Ádette mundai adamdardyń jalaqysy joǵary bolady», - dedi qor basshysy.
Degenmen, Almasadam Sátqaliev táýelsiz direktorlardyń jalaqysy qaita qaralyp, qysqarǵanyn jetkizdi.
«Táýelsiz direktorlardyń jalaqysyn, syilyqaqylaryn barynsha qysqartý jumysy júrgizildi. Shamamen 30 paiyzǵa qysqarttyq. Basshylyq qyzmetkerlerdiń jalaqysy qysqarǵan joq. Biraq biz basqa jolmen júrip, basqarýshy direktorlardyń sanyn eki ese azaittyq jáne jalaqy qory qysqardy», - dedi ol.
