«Samuryq-Qazyna» qory kompaniialar tobynda qyzmet etetin jumysshylardyń jalaqasyn kóterý jalǵasady. Bul týraly Senatta «Halyq tabysyn arttyrýdyń 2025 jylǵa deiingi baǵdarlamasy» keshendi josparyn iske asyrýdy talqylaý kezinde Premer-Ministrdiń orynbasary Eraly Toǵjanov málim etti, dep habarlaidy QazAqparat.
«Baǵdarlamanyń mańyzdy bóligi jańa ekonomikalyq ósimge arnalǵan. Azamattardyń jumysqa ornalasýyna jaǵdai jasaý, sondai-aq jańa daǵdylar men kásipke jumyldyratyn janama is-qimyldar qamtylǵan. 1,1 mln-nan astam jumysshynyń eńbekaqysyn kóterý eskerilgen, onyń ishinde biýdjet salasynyń 850 myńnan asa qyzmetkeriniń laýazymdyq ailyq aqysy artady. Dárigerlerdiń jalaqysy 320 myńnan 531 myń teńgege deiin, orta meditsina qyzmetkerleriniń jalaqysy 173 myńnan 250 myń teńgege deiin ósedi», - dedi E.Toǵjanov.
Sonymen qatar ol biyl sáýirden bastap «Samuryq-Qazyna» qory kompaniialar tobynyń 258 myń óndiristik personalynyń jalaqysy 5-ten 48 paiyzǵa deiin kóterilgenin aitty. Bul rette jalaqysy tómen qyzmetterge basymdyq berildi.
«Qordyń ishki rezervinen qyzmetkerlerdiń kiristerin arttyrý boiynsha jumys jalǵasatyn bolady. Jyl sońyna deiin taǵy 4 kompaniiada óndiristik personal jalaqysy 5-ten 18 paiyzǵa deiin ósedi», - dedi Úkimet basshysynyń orynbasary.
