«سامۇرىق-قازىنا» قورى كومپانييالار توبىندا قىزمەت ەتەتٸن جۇمىسشىلاردىڭ جالاقاسىن كٶتەرۋ جالعاسادى. بۇل تۋرالى سەناتتا «حالىق تابىسىن ارتتىرۋدىڭ 2025 جىلعا دەيٸنگٸ باعدارلاماسى» كەشەندٸ جوسپارىن ٸسكە اسىرۋدى تالقىلاۋ كەزٸندە پرەمەر-مينيستردٸڭ ورىنباسارى ەرالى توعجانوۆ مەلٸم ەتتٸ, دەپ حابارلايدى قازاقپارات.
«باعدارلامانىڭ ماڭىزدى بٶلٸگٸ جاڭا ەكونوميكالىق ٶسٸمگە ارنالعان. ازاماتتاردىڭ جۇمىسقا ورنالاسۋىنا جاعداي جاساۋ, سونداي-اق جاڭا داعدىلار مەن كەسٸپكە جۇمىلدىراتىن جاناما ٸس-قيمىلدار قامتىلعان. 1,1 ملن-نان استام جۇمىسشىنىڭ ەڭبەكاقىسىن كٶتەرۋ ەسكەرٸلگەن, ونىڭ ٸشٸندە بيۋدجەت سالاسىنىڭ 850 مىڭنان اسا قىزمەتكەرٸنٸڭ لاۋازىمدىق ايلىق اقىسى ارتادى. دەرٸگەرلەردٸڭ جالاقىسى 320 مىڭنان 531 مىڭ تەڭگەگە دەيٸن, ورتا مەديتسينا قىزمەتكەرلەرٸنٸڭ جالاقىسى 173 مىڭنان 250 مىڭ تەڭگەگە دەيٸن ٶسەدٸ», - دەدٸ ە.توعجانوۆ.
سونىمەن قاتار ول بيىل سەۋٸردەن باستاپ «سامۇرىق-قازىنا» قورى كومپانييالار توبىنىڭ 258 مىڭ ٶندٸرٸستٸك پەرسونالىنىڭ جالاقىسى 5-تەن 48 پايىزعا دەيٸن كٶتەرٸلگەنٸن ايتتى. بۇل رەتتە جالاقىسى تٶمەن قىزمەتتەرگە باسىمدىق بەرٸلدٸ.
«قوردىڭ ٸشكٸ رەزەرۆٸنەن قىزمەتكەرلەردٸڭ كٸرٸستەرٸن ارتتىرۋ بويىنشا جۇمىس جالعاساتىن بولادى. جىل سوڭىنا دەيٸن تاعى 4 كومپانييادا ٶندٸرٸستٸك پەرسونال جالاقىسى 5-تەن 18 پايىزعا دەيٸن ٶسەدٸ», - دەدٸ ٷكٸمەت باسشىسىنىڭ ورىنباسارى.
