«Samuryq-Qazyna» ál-aýqat ulttyq qorynda korporativtik ortalyq qyzmetkerlerdiń sany 248-den 124-ke deiin azaidy. Bul týraly qordyń basqarma tóraǵasy Almasadam Sátqaliev málim etti, dep habarlaidy QazAqparat.
«Qor qyzmetin reformalaý 2 baǵyttan turady: jedel jáne júieli reformalar. Jedel sharalar týraly aitsaq, biz qordyń korporativtik ortalyq qyzmetkerlerin 2 esege qysqarttyq, 248-den 124-ke deiin. Basqarý salasyndaǵy laýazym sany 10-nan 5-ke azaidy. Sonymen qatar qurylymdyq bólimshilerdiń sany qaita qaralyp, 27-den 18-ge kemidi. Odan bólek, qordaǵy keńesshiler institýtynyń jumysy toqtady. Bul salada eńbek etken 106 adam qysqardy», – dedi Almasadam Sátqaliev Ortalyq kommýnikatsiialar qyzmeti alańynda ótken baspasóz máslihatynda.
Sondai-aq, «Samuryq-Qazyna» ál-aýqat ulttyq qorynyń sheteldegi ókildikteri jabylǵan. Onyń qatarynda London, Abý-Dabi, Beijiń jáne Máskeý bar.
«Joǵaryda atalǵan shuǵyl sharalar jylyna 2 mlrd 600 mln teńgeni únemdeýge septigin tigizedi. Bul baǵyttaǵy jumystar qor qaramaǵyndaǵy portfeldik kompaniialarǵa da qatysty. Búginde biýdjetke ózgertýler engizilip jatyr, ol jazda daiyn bolady. Sonyń qorytyndysy boiynsha portfeldik kompaniialar qyzmetine de qysqartýlar júredi dep josparlap otyrmyz. Qor qyzmetindegi jańashyldyqtyń biri – óndiristik qyzmetkerlerdiń jalaqysy 48 paiyzǵa artty», - deidi ol.
Onyń aitýynsha, jalaqynyń artýy óndiris salasynda eńbektenip jatqan 200 myń jumysshyǵa qatysty.
