Eks-prezident Nursultan Nazarbaevtyń inisi Samat Ábish shartty sottaldy dep habarlaidy "Ult Aqparat" májilis depýtaty Ermurat Bapidyń feisbýk paraqshasyna silteme jasap.
26 aqpan kúni Nursultan Nazarbaevtyń nemere inisi, Qazaqstan Respýblikasy Ulttyq qaýipsizdik komiteti tóraǵasynyń eks-birinshi orynbasary Samat Ábish jabyq sottyń sheshimimen 8 jylǵa shartty túrde sottaldy. «Onyń general ataǵy men memlekettik marapattary alyndy. Biraq menshik-múlkine konfiskatsiia jasalmady», dep habarlady «DAT»-tyń insaiderlik aqparat kózi.
Eske sala keteiik, buǵan deiin Qazaqstanda eshkim 8 jylǵa shartty túrde sottalmaǵan. Soǵan qaraǵanda, múddeli bireýler «8 jyl» degen edáýir jazamen qoǵamdy aldarqatyp, al shyndyǵynda Samat Ábishti túrme jazasynan alyp qalǵan. Qańtar oqiǵasyna birden-bir kináli kúshtik qurylymnyń joǵary dárejeli laýazymgeri osylaisha tiisti jazadan qutyldy. Álbette, bul «komediianyń» basty rejisseri Nursultan Nazarbaev ekeni taiǵa tańba basqandai aian jaǵdai.
Eń qiyny – bul Ádiletti Qazaqstan qurý bastamasyn alǵa qoiǵan qazirgi Prezidentimiz Qasym-Jomart Toqaevtyń bedeline belgili bir deńgeide nuqsan keltirip, halyqtyń onsyz da tómen bilikke degen senimine taǵy bir úlken syzat túsirgeli tur. Jaǵdai osylai jalǵasa berse, Táýelsiz Qazaqstan tarihyndaǵy eń qaiǵyly oqiǵa – Qańtar qasiretin uiymdastyrǵan qylmyskerler túk bolmaǵandai, Samat siiaqty sairan salyp, tairań qaǵyp, menshik-múlikteri de tárkilenbei, emin-erkin júre beretin bolsa, kerisinshe, eshnárseni búldirmegen, eshqandai qylmysy joq qoǵam belsendileri jazyqsyz qýdalanyp, naqty jazaǵa tartyla beretin bolsa, onda – jańa Qazaqstannyń tańy jaqyn jyldarda ata qoimaityny anyq. Bul qazaq qoǵamyn ábden yzalandyryp, halyqtyq kóteriliske soqtyrýy bek múmkin! Otyz jyl boiy álaýlaiym taýsylsa, hálaýlaiym bar degen bitpes ertegige aldanyp kelgen halyq endi otyz kún aldaýǵa da kóne qoimas!
Buǵan memleket basshysynyń jyl basynda «Egemen Qazaqstan» gazetine bergen suhbatynda aitqan myna pikiri de anyq dálel: «...Bir sózben aitsaq, eski júie kelmeske ketti. Qazaqstandaǵy saiasi reformalar júieli ǵana emes, eshqashan keri qaitpaityn túbegeili sipatqa ie boldy dep senimmen aita alamyz. Munyń elimiz úshin airyqsha mańyzy bar. Sebebi ulttyń saiasi sana-sezimi túbegeili ózgerdi. Jurttyń quqyqtyq saýattylyǵy men belsendiligi demokratiialyq jańǵyrýdyń basty kepiline ainaldy. Toqeterin aitsaq, keri ketýge halyqtyń ózi jol bermeidi jáne elge jańa lep ákelgen osy ózgeristerdi tabandylyqpen qorǵaidy. Men buǵan bek senimdimin».
Budan uǵatyn taǵy bir kereǵar oi – Samat Ábishke qatysty eski júieniń áli eshqaida kete qoimaǵany! Eger ádiletti, jańa júie qalyptasty desek, onda tek UQK tóraǵasynyń burynǵy birinshi orynbasary ǵana emes, 238 adam qaza taýyp, milliardtaǵan materialdyq shyǵyn ákelgen Qańtar qasiretine jaýapty úlkendi-kishili barlyq shendiler túgeldei jaýapqa tartylyp, tiisti jazalaryn alýlary kerek edi. Úlken ókinishke qarai, áli olai bolmai tur. Otyz jyl boiy qara halyqty zar qaqsatyp, elimizdiń bar bailyǵyn baýyryna basqan eski Qazaqstannyń ókilderi buǵan barynsha qarsylyq kórsetip, ótkendi ańsap, soǵan qaityp kelýge tyrysyp baǵýda.
«Qamysty bos ustasań, qolyńdy kesedi» deidi qazaq danalyǵy. Eger jańa Qazaqstan eski Qazaqstanǵa qatysty solqyldaqtyq tanytyp, burynǵy prezidenttiń mańyna toptasqan, 220 trillion teńgeni zańsyz iemdengen, aqyr sońynda Qańtar qasiretin uiymdastyrǵan oligarhtardy qylmysyna sai jaýapqa tartpasa, bul eshqandai jaqsylyqqa ákelmeidi.
Osy oraida, 2005 jyly 13 mamyrda Andijan oqiǵasy bolǵan kezde Ózbekstannyń burynǵy prezidenti, marqum Islam Kárimovtyń: «Maǵan myń buzaqydan 30 million halqymnyń keleshegi qymbat» degen sózi eske túsedi. Ol sóitip, elde turaqsyzdyq ornatyp, memleketke qaýip tóndirgisi kelgen qylmyskerlerdi eshqandai aiaýsyz qyryp salǵan edi.
Eger biz endi ǵana 20 millionnan asqan Qazaqstan halqynyń keleshegin oilaityn bolsaq, azat zamanda az halqyn tonap kelgen, jańarýǵa, jańǵyrýǵa, ádiletti qoǵam, kemel keleshek qurýǵa kedergi keltirip, qarsy turatyn eski Qazaqstannyń ókilderine eshqandai keńshilik kórsetpeýimiz kerek!
