Qazaqstanda iri kólemde salyq bereshegi bar azamattarǵa elden shyǵýǵa ýaqytsha tyiym salynýy múmkin. Jańa talap 2026 jylǵy 1 shildeden bastap kúshine enedi, dep habarlaidy ult.kz.
Memlekettik kirister komitetiniń málimetinshe, bul shara zańdy tulǵalardyń basshylaryna, jeke kásipkerlerge jáne jeke praktikamen ainalysatyn azamattarǵa qatysty qoldanylady.
Eger salyq bereshegi 27 myń AEK-ten asyp, iaǵni 116 million teńgeden kóp bolyp, úsh aidan astam ýaqyt ótelmese, azamattyń Qazaqstannan shyǵýyna shekteý qoiylýy yqtimal.
Alaida vedomstvo tyiym avtomatty túrde engizilmeitinin atap ótti. Shekteý tek sot sanktsiiasymen jáne memlekettik kirister organdarynyń arnaiy qaýlysy negizinde ǵana kúshine enedi.
Sonymen qatar zańda áleýmettik jaǵdailar da eskerilgen. Eger azamatqa shetelde em qabyldaý qajet bolsa jáne ony rastaityn meditsinalyq qujattar usynylsa, ýaqytsha shekteý toqtatylýy múmkin.
MKK málimetinshe, shekteý salyq qaryzy tolyq ótelgennen keiin nemese mindetteme zań aiasynda toqtatylǵan jaǵdaida alynady.
Barlyq qaýlylar memlekettik organdar men UQK-niń aqparattyq júieleri arqyly elektrondy túrde joldanady.
Vedomstvo jańa norma salyqtan jaltarýdyń aldyn alyp, biýdjetke túsetin túsimderdi arttyrýǵa baǵyttalǵanyn málimdedi.
Aita keteiik, jańa Salyq kodeksi 2026 jyldyń basynan kúshine engen. Keiin Prezident Qasym-Jomart Toqaev kodekske qajet bolǵan jaǵdaida ózgerister engizilýi múmkin ekenin aityp, qujattyń “qasietti jazý emes” ekenin málimdegen bolatyn.
