Qazaqstanǵa kólikterdi, negizinen Grýziia men Ázerbaijan azamattary ákeledi. Mundai kólik quraldary keiin el azamattarynyń "ieligine" beriledi. Bul týraly Memlekettik kirister komiteti habarlady, - dep habarlaidy Tengrinews.kz.
Vedomstvo málimetinshe, Eýraziialyq ekonomikalyq odaqtyń (EAEO) keden aýmaǵyna úshinshi elderden ýaqytsha ákelingen kólik quraldary sheteldik taýar sanalady jáne kedendik baqylaýda bolady.
"MKK ýaqytsha ákelingen kólik quraldaryn satyp alýǵa jáne Qazaqstan aýmaǵynda paidalanýǵa tek kedendik tazartýdan soń jáne sáikesinshe tiesili kedendik alymdar men salyqtardy tólegen soń ǵana qoldanýǵa bolatynyn eskertedi", - delingen habarlamada.
MKK málimetinshe, shet el azamattary kólik quraldaryn ákelgennen soń Qazaqstan aýmaǵynan belgili bir ýaqytta ketip qalatyny baiqalǵan.
"Iaǵni, EAEO aýmaǵyna avtokólik quraldary ákelingende, Qazaqstan azamatyna berý maqsatynda kelgen dep boljanady. Ýaqytsha ákelý merzimi aiaqtalǵannan keiin (bul 1 jyl) avtokólik quraldary EAEO aýmaǵynan shyǵyp ketýi qajet. Eger shyǵyp ketpese, EAEO-tyń qoldanystaǵy zańnamasyna sáikes tiisti sharalar qoldanylady", delingen MKK habarlamasynda.
Qazirgi ýaqytta 116 avtokólik quraly ustalyp, ýaqytsha saqtaý qoimalaryna ornalastyrylǵan.
"Siz satyp alǵaly jatqan avtokóligińizdiń shyǵý tegi nemese zańdylyǵy kúdik týǵyzatyn bolsa, onda Qazaqstanda kedendik tazartýdan ótkeni jáne tiesili kedendik alymdar men salyqtar tólegeni týraly aqparatty memlekettik kirister organdarynan bilýge bolady. Ol úshin komitetke (87172 71 77 24) nemese turǵylyqty jerdegi Memlekettik kirister departamentine, sonymen qatar QR QM MKK bailanys ortalyǵyna habarlasýǵa bolady", - dedi MKK ókilderi.
