Qazaqstanda salyq tóleý protsesi odan ári jeńildetilip, talap etilip kelgen tólem qujattary azaityldy. Bul «E – Salyq» mobildik qosymshasyndaǵy «Salyq ámiiany» qyzmetiniń arqasynda múmkin boldy. Ony «App Store» jáne «Play Market»-ten júkteýge bolady, dep habarlaidy "Ult aqparat".
«Kazirgi kezde innovatsiiany 7 090 adam paidalandy. Olar ózderiniń jeke shottaryn 22,9 million teńgege toltyrdy», - delingen QR Qarjy ministrligi Memlekettik kirister komiteti baspasóz qyzmetiniń málimetinde.
«Salyq ámiianyna» aqsha jiberý arqyly salyq tóleýshi birqatar jeńildikterge ie boldy:
• «Salyq ámiianynan» salyq bereshegin avtomatty túrde esepten shyǵarý;
• qaryz somalaryn bir salyqtan ekinshi salyqqa avtomatty túrde aýdarý;
• tólem týraly habarlama alý;
• negizsiz salyq sanktsiialaryn alyp tastaý;
• qate tólemderdi joiý;
• salyq salý obektilerin qaraý.
Sondai-aq, «E – Salyq» mobildik qosymshasynda azamattarǵa yńǵaily bolý úshin jol politsiiasy organdarynda tirkeý esebinde turǵan kólik quraldary boiynsha derekterdi qaraýǵa, salyqtyń qandai kólik quraldarymen eseptelgenin kórýge múmkindik bar.
Bul qyzmet kólik quralynyń sipattamalaryn ózgertýge, ony óz atynan shyǵarýǵa (satýǵa) bailanysty kólik quralyn málimetter bazasynan alyp tastaý úshin onlain rejiminde júginýge múmkindik beredi.
«Iske qosylǵannan bastap, biylǵy 19 qazanǵa deiin 7 493 adam túzetý múmkindigin paidalanyp úlgerdi, onyń – 7 312-si kólikke, 117-si múlikke qatysty.
Interfeiste tiisti satý qujattaryn nemese kólik quralynyń derekterin túzetý jetkilikti. Birneshe kún ishinde aqparat túzetiledi.
Sonymen qatar, 30 maýsymnan bastap – 507 salyq tóleýshi artyq tólemderdi basqarý qyzmetin qoldanyp úlgerdi.
Jalpy, portalǵa kirip, mobildik qosymshany 96 263 adam júktep úlgerdi.
Tólenýge jatatyn kólik salyǵynyń somasyn Memlekettik kirister komitetiniń www.kgd.gov.kz portaly, egov.kz elektrondy úkimet portaly, sondai-aq turǵylyqty jeri boiynsha aýdandyq Memlekettik kirister basqarmalary arqyly bilýge bolady», - delingen aqparatta.
