Qaraǵandy oblysynyń Álihan Bókeihan aýdanynyń prokýratýrasy egde jastaǵy azamattarǵa qatysty alaiaqtyq jasaǵan azamatqa qatysty qylmystyq is boiynsha memlekettik aiyptaýdy qoldady, dep habarlaidy ult.kz.
Tergeý jáne sot materialdaryna sáikes, sottalýshy internet-resýrstar arqyly qart adamdardyń bailanys nómirlerin anyqtap, olarǵa telefon shalǵan. Áńgime barysynda óziniń kim ekenin aitpai, beitarap taqyryptan sóz bastap otyrǵan.
Jábirlenýshiler qońyraý shalýshyny shetelde turatyn týystarynyń biri dep oilaǵan. Osy jaǵdaidy paidalanǵan alaiaq olardyń jańsaq pikirin ádeii qoldap, sálemdeme alý nemese basqa da syltaýlarmen kýrer arqyly aqsha berýge kóndirgen.
Keiin kúdikti aqshany ózi alyp ketip, oqiǵa ornynan jasyrynǵan.
Qylmystyq áreketterdiń saldarynan 10 egde jastaǵy azamat jábirlenýshi dep tanyldy. Olarǵa keltirilgen materialdyq shyǵyn kólemi 50 myń teńgeden 1 million 750 myń teńgege deiin jetken.
Sot úkimimen aiyptalýshy Qazaqstan Respýblikasy Qylmystyq kodeksiniń 190-baby 3-bóliginiń 4) tarmaǵy boiynsha kináli dep tanylyp, ortasha qaýipsizdik mekemesinde óteý úshin 4 jyl 7 ai merzimge bas bostandyǵynan aiyryldy.
Prokýratýra bul úkim alaiaqtyq qylmystary úshin jaýapkershiliktiń bultartpaitynyn kórsetetinin atap ótti.
Qadaǵalaý organy azamattardy belgisiz nómirlerden keletin qońyraýlarǵa saqtyqpen qaraýǵa, kúmándi aqparatty mindetti túrde týystary arqyly tekserýge jáne aqsha qarajatyn beitanys adamdarǵa bermeýge shaqyrdy.
