Jańadan qurylǵan Ǵylym jáne joǵary bilim ministrliginiń basshysy Saiasat Nurbek áleýmettik jelide taralǵan qaýesetterge jaýap berdi, dep habarlaidy Sputnik Qazaqstan.
"Sizdi áleýmettik jelide jat aǵymdarmen bailanystyrǵandar boldy. Naqtyraq aitqanda, salafizmmen. Bekbolat Tileýhanmen birge túsken sýretińizdi jariialap, siz týraly túrli áńgime tarady. Dini kózqarasyńyzdy ashyq aityńyzshy?" dep surady jýrnalister Úkimet kýlýarynda ministrden.
"Men, Qudaiǵa shúkir, musylmanmyn. Salafizmge eshqandai qatysym joq. Bilesizder, men atam men ájemniń qolynda óstim. Meniń atam Nurbek degen kisi, Semei qalasynda imam, molda boldy. Sondyqtan kishkentai kezinen men dinge, islamǵa jaqyn adammyn. Biraq eshqandai radikaldy aǵymdarǵa, sektalarǵa, salafizmge qatysym joq. Ony ashyq túrde aitýǵa bolady", - dep jaýap berdi Nurbek.
Ol Bekbolat Tileýhandy óneri úshin syilaitynyn atap ótti.
"Myńdaǵan jastarymyz Bekbolat aǵamyzben sýretke túsken shyǵar. Olardyń bári salafit dep aitýǵa bolmaidy. Bekbolat Tileýhan, eń birinshi, bizdiń aǵamyz, aqyn, óner adamy. Sol sebepti men ol kisini aqyndyǵy úshin, óneri úshin, al aǵalyǵy úshin qurmetteimin, qadirleimin", - dedi ǵylym ministri.
11 maýsymda Bilim jáne ǵylym ministrligi eki vedomstvoǵa bólindi. Prezident jarlyǵymen Ashat Aimaǵambetov oqý-aǵartý ministri bolyp, al Saiasat Nurbek ǵylym jáne joǵary bilim ministri laýazymyna taǵaiyndaldy.
