Foto: Egemen.kz
Májilis depýtaty Ashat Aimaǵambetov sýitsid taqyrybyn mediada jariialaýǵa qatysty problemany kóterdi. Bul týraly ol óziniń Telegram-daǵy arnasynda jazdy.
"Verter áseri" – bul fenomen, sýitsid týraly aqparattar jariialanǵannan keiin óz-ózine qol jumsaý jaǵdailarynyń kóbeiýin kórsetedi, ásirese mundai habarlamalar buqaralyq aqparat quraldarynda keńinen taratylǵan kezde baiqalady.
Kóptegen zertteýler kórsetkendei, sýitsid týraly jariialanymdar "imitatsiialyq sýitsid "dep atalatyn jaǵdailardy týdyrýy múmkin.
Bul fenomenniń negizgi zertteýshileriniń biri — Phillips D.P. (1974). Onyń zertteýi «The Influence of Suggestion on Suicide: Substantive and Theoretical Implications of the Werther Effect» dep atalady, jáne ol sýitsid oqiǵalarynyń Ulybritaniia men AQSh-taǵy gazetterde (1947-1968 jyldary) jariialanǵannan keiin aitarlyqtai óskenin kórsetedi. Mundai oqiǵalarǵa neǵurlym kóp nazar aýdarylsa, sýitsid sany da soǵurlym artady degen tujyrym jasalǵan", - dedi depýtat.
Aimaǵambetovtiń aitýynsha, sýitsidtiń aldyn alýmen ainalysatyn kóptegen uiym bul taqyrypty qalai durys jariialaý kerektigi týraly BAQ-qa arnalǵan nusqaýlyqtar ázirledi.
Depýtat bul nusqaýlyqtardy oryndaý imitatsiialyq minez-qulyq qaýpin azaitýǵa kómektesetinin aitty.
"DDSU (Dúniejúzilik densaýlyq saqtaý uiymy) da mediaǵa sýitsid týraly jaýapty túrde habarlaý boiynsha usynymdar shyǵarǵan. Bul sezimtal máselege muqiiat jáne saqtyqpen qaraý óte mańyzdy, óitkeni ol osal toptar úshin táýekelder týdyrýy múmkin", - dedi Ashat Aimaǵambetov.
