Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasynyń negizgi maqsaty – saqtandyrý naryǵyn jáne baǵaly qaǵazdar naryǵyn odan ári damytý. Ol úshin jańa ónimder engizý, qyzmetterdi tsifrlandyrý, tutynýshylar men investorlardyń quqyǵyn qorǵaý, zańnamany úzdik halyqaralyq praktikaǵa sáikes keltirý talap etiledi. Zań jobasynda úsh kodekske jáne 27 zańǵa ózgerister men tolyqtyrýlar engizý kózdeledi.
«Zań jobasynda Saqtandyrý ombýdsmanynyń klientterdiń saqtandyrý uiymymen kelispeýshilikterin sotqa deiingi retteýi kózdeledi. Saqtandyrý ombýdsmanynyń biliktiligine talaptar ulǵaiady jáne keńse qyzmetkerlerine talaptar belgilenedi», - dedi QR Qarjy naryǵyn retteý jáne damytý agenttiginiń tóraiymy Mádina Ábilqasymova.
Onyń aitýynsha, zańnamalyq bastamalardyń blogy Qazaqstannyń qor naryǵyn odan ári damytýǵa baǵyttalǵan. Qor naryǵyn kapitaldandyrý jyl basynan beri 40 paiyzǵa ulǵaiyp, 47,3 trln teńgeni nemese Ishki jalpy ónimniń 67 paiyzyn qurady. Búgingi kúni investorlardyń quqyqtary men múddelerin qorǵaýdy kúsheitý bastamalary asa mańyzdy. Qor naryǵynda bólshek investorlardyń eleýli ósýi baiqalyp otyr.
«Qazaqstandyq brokerler úshin klienttiń investitsiialyq beiinin mindetti baǵalaý týraly talap engiziledi. Bul beiin onyń bilimine, tájiribesine jáne qolyndaǵy qarajatyna qarai aiqyndalady. Nátijesi boiynsha investorlarǵa beiinine sáikes qarjy quraldarynyń tizbesi usynylady. Investorlardyń quqyǵyn qorǵaýdaǵy mańyzdy bastama - kompaniialarda korporativtik basqarý júiesin jetildirý», - dedi agenttik basshysy.
Zań jobasynyń kelesi baǵyty – qor naryǵynyń infraqurylymyn jetildirý.
Sonymen qatar, qor naryǵyn ary qarai tsifrlandyrý kózdelgen. Baǵaly qaǵazdardy shyǵarý protsesiniń biryńǵai tsifrlyq formatqa tolyq kóshýi qamtamasyz etiledi.
Aita keteiik, zań jobasynda jinaqtaýshy saqtandyrýdy damytý úshin jańa áleýmettik mańyzdy saqtandyrý ónimderin engizý kózdeledi.
Bul memlekettik bilim berý jinaqtaýshy júiesi aýqymynda jinaqtaýshy saqtandyrý jáne birlesken erli-zaiypty zeinetaqy annýiteti. Bilim berý jinaqtaýshy saqtandyrý ónimi balanyń joǵary oqý ornynda oqýyna aqy tóleý úshin aqshany kepildikpen jinaqtaýǵa múmkindik beredi. Bul ónim qosymsha saqtandyrýdy qamtamasyz etedi
«Ekinshi ónim - birlesken erli-zaiypty zeinetaqy annýiteti. Birlesken annýitet erli-zaiyptylardyń nemese jaqyn týystarynyń zeinetaqy jinaqtaryn biriktirýge múmkindik beredi. Eger erli-zaiyptylardyń birinde zeinetaqy jinaǵy jetpei, al ekinshisinde artyq bolsa, olar zeinetaqy jinaqtaryn birge qosyp, zeinetaqy annýitetin satyp alady. Sonymen birge, tólemderdi ómir boiy alýǵa múmkindik alady», - dep túsindirdi agenttik basshysy.
